Қауіпті сейілткен теміржолшының анасы алғысқа бөленді
"Қазақстан теміржолшысы" газетінің Жамбыл облысындағы меншікті тілшісі
10 мамыр – Халықаралық аналар күніне орай «ҚТЖ-Жүк тасымалы» ЖШС бас директоры Асан Үмбетов осы саладағы өз ісіне адал, алғырлығы мен шұғыл әрі дұрыс шешім қабылдауының арқасында қауіп-қатердің алдын алған теміржолшылардың аналарымен Zoom жүйесі арқылы жүздесіп, алғысын жеткізді. Олардың қатарында Жамбыл локомотив пайдалану депосының машинисі Марат Абызовтың анасы Алтынай Жұмашева да бар.
Алтынай Мырзағалиқызын «ҚТЖ-Жүк тасымалы» ЖШС «Жамбыл» филиалының басшылығы да құттықтап, елге қызмет етер ұл тәрбиелеген анаға оқалы шапан кигізіп, иығына орамал жауып, ұжым атынан құрмет көрсетті.
Алтынай Мырзағалиқызы өз кезегінде ұлының ісін бағалап, еңбегін елеп, анасы деп құрмет көрсетіп жатқан басшыларға ризашылығын жеткізді. Аналық ақ батасын беріп, ұжымның жұмысына табыс тіледі.
Марат Сәрсенбайұлы – отбасындағы төрт ұлдың үшіншісі болғанымен, әулеттегі алғашқы теміржолшы. 13 жылдан бері Жамбыл локомотив пайдалану депосында еңбек етіп келеді. Алты жыл көмекші ретінде тәжірибеде ысылған маманның жолаушылар пойызының электровоз машинисі болып жолда жүргеніне жеті жылға жуықтапты.
Былтыр машинист Мараттың Аспара – Шу учаскесінде өткелде трактордан ажырап қалған тіркемеге 2 метр жеткізбей, «Ақтөбе – Алматы» бағытындағы №34 жолаушылар пойызын шұғыл тоқтатып, апаттың алдын алған ерлігі бүкіл елге тараған. Осы батыл әрекеті үшін өткен жылы Марат Абызовты Мемлекет басшысы Қасым-Жомарт Тоқаев «Адал еңбегі үшін» төсбелгісімен марапаттаған болатын.