Мамандық таңдау – маңызды іс
"Қазақстан теміржолшысы" газетінің Жамбыл облысындағы меншікті тілшісі
Шу локомотив пайдалану депосының басшылығы Шу ауданындағы Т.Рысқұлов атындағы орта мектеп түлектерімен кездесті.
Кездесуде депо директорының орынбасарлары Мейірхан Бекжанұлы еңбек нарығында кәсіптік-техникалық мамандықтарға сұраныс жоғары екенін айтып, дұрыс таңдау жасауға шақырса, Ғалымжан Дәулетұлы локомотив шаруашылығында еңбек ету мүмкіндіктеріне тоқталды.
Мамандар Шу локомотив пайдалану депосының құрылған кезден бергі тарихымен таныстырды. Соңғы жылдарда депо паркінің жаңа электровоз, тепловоздармен толыққанын, теміржолшыларға, оның ішінде жастарға көрсетілетін әлеуметтік қолдау шараларына тоқталды.
Тоғыз жолдың торабында орналасқан Шу қаласында бірнеше буын ұрпағы болашағын шойын жолмен байланыстырған теміржолшылар әулеті көп. Мұндай отбасында өскен жастар темір жол тұрақты табыс көзі екенін жақсы біледі. Ал үлкен өмірге қадам басып, таңдау жасағалы тұрған басқа мектеп бітірушілерге сала мамандарының бағыт-бағдары керек. Кездесуде жастар машинист мамандығы, депода еңбек етудің артықшылықтары туралы сұрақ қойды. Сала басшылары жастарға қандай оқу орнында білім алуға болатынын түсіндіріп, кеңес берді.
Сондай-ақ оқушыларға теміржол өткелдерінен өту кезінде қауіпсіздік талаптарын сақтау керектігін ескертті.