Ревизорлар неге алаңдайды?

Жуырда «ҚТЖ» ҰК» АҚ Қауіпсіздік департаментінің Семей учаскесі бойынша аймақтық бас ревизоры Темірбек Акчалов Семей ЖТ филиалы және Семей магистральдық желі бөлімшесі басшыларының басын қосып, есептік тыңдау өткізді.

Басқосуда жыл басынан бергі қозғалыс қауіпсіздігін бұзу бойынша бірқатар өзекті мәселелер сөз болды. Жиында сөз алған бас ревизор өткен төрт ай ішінде бөлімше көлемінде тіркелген қозғалыс қауіпсіздігін бұзу фактілеріне тоқталып, алдағы жұмыстарды ширату қажеттігін баса атап өтті. РБ-6 аппараты жүргізген қадағалау, тексеру іс-шаралары бірқатар мәселелерді анықтағаны белгілі болды.  

Солардың арасында мысалы нормативтік-техникалық құжаттамалардың болмауы бойынша 11 кемшілік, аталмыш құжаттарды жүргізу бойынша 21 кемшілік анықталған. Яғни қозғалыс шаруашылығында, коммерциялық жұмыс, одан бөлек локомотив шаруашылығында кемшіліктер көбейіп отыр. Барлық мекемелер басшылары жіберілген актілерді алды. Тиісті шаралар қолданылады.  

– Желі бойындағы қозғалыс қауіпсіздігін сақтау бойынша РБ-6 аппараты әр ай сайын талдау жасауда. Семей магистральдық желі бөлімшесі және желі бойындағы мекемелер басшыларына жіберілген ақауларды қалпына келтіріп, қауіпсіздікті бұзуға алып келетін себептерді қайталамау бойынша нақты ұсыныстар беріледі, – деді бұл орайда пікір білдірген Темірбек Иманғабасұлы.  

Айтуынша, әсіресе желі бойында локомотивтерді шұғыл тежеу жағдайлары мейлінше өзекті болып тұр. Мәселен қала іргесіндегі кірме жолда тепловозбен автобустың соқтығысуы орын алды. Абырой болғанда адам шығыны жоқ.  

Сол тәрізді жолдағы қараусыз малды хабарлауда машинистер мен диспетчерлер жұмысының, жолшылардың үйлесімділігін арттыру қажет. Әсіресе Жаңа-Семей жол дистанциясына қарасты телім бойы алаңдаушылық тудырып отыр. Мал басу фактілерінің басым көпшілігі осы аумақта орын алған. Шұғыл тежелу артқаны себепті ревизорлар тіпті жолаушылар пойызының қозғалысына уайымдай бастаған. «Жаман айтпай жақсы жоқ» деген, салмағы жеңіл Тальго пойызының рельстен шығып кетуіне үйірлі жылқылармен соқтығысу жетіп жатыр.  

Бес ай ішінде мұндай 51 жайт орын алған. Өкініштісі, соның ішінде екі рет көлікпен соқтығысу апаты және бір адамды басу фактілері тіркелген. Сол тәрізді желі бойында мал басу оқиғаларының да саны артып отыр. Қараусыз мал бойынша желіге жақын орналасқан ауыл тұрғындары мен шаруа қожалықтары жауапсыздық танытса, теміржол өтпелерінде кейбір көлік жүргізушілері жылжымалы құрамнан төнер қауіпті елемейді. Осыған орай бас ревизор Темірбек Акчалов НОД-ЖТ филиалы және НЖС-6 басшыларына бірқатар нұсқау түріндегі міндеттемелерді атап көрсетті. Мәселен, жол полициясымен бірге көлік жүргізушілерін ақпараттандыру шараларын өткізу күн талабында тұр. Сонымен қатар теміржол өтпелері бойындағы жол бегілерін жаңартуға да күш салу қажет. Бұл шаралардың сыртында теміржол бойындағы қауіпсіздік талаптарын орындау бойынша тұрғындармен алдын алу, түсіндіру жұмыстарын ширату, атқарушы билік өкілдерімен бірлескен жұмыстарды күшейту керек.  

Бұл нұсқаулардың орындалу барысы бөлімше басшыларымен қатар аймақтың бас ревизорының да тұрақты назарында болады.