Қоршаған ортаны қорғау – ортақ міндет
"Қазақстан теміржолшысы" газетінің Жамбыл облысындағы меншікті тілшісі
«ҚТЖ – Жүк тасымалы» ЖШС «Жамбыл» филиалында Дүниежүзілік қоршаған ортаны қорғау күніне орай салалық-тәжірибелік конференция ұйымдастырылды. «Климаттың өзгеруінің теміржол инфрақұрылымына әсері» тақырыбын талқылаған жиын аралас форматта өтіп, барлық құрылымдық бөлімшелер қатысып, қашықтағы жауапты мамандары бейнебайланыс арқылы қосылды.
Конференция модераторы, «ҚТЖ – Жүк тасымалы» ЖШС «Жамбыл» филиалының бас инженері Дүйсенбек Сыдықов Дүниежүзілік қоршаған ортаны қорғау күні – әлемде, оның ішінде елімізде табиғатты қорғау және ресурстарды ұтымды пайдалану мәселелеріне қоғамның назарын аударуға ықпал етіп отырғанын, экологиялық проблемалар теміржолшылар назарынан тыс қалмайтынын атап өтті.
– Қазіргі заманның өзекті экологиялық проблемаларының бірі – климаттың өзгеруі. Орташа ауа температурасының жоғарылауы экстремалды ауа-райы құбылыстарын жиілетуде. Жауын-шашын режимінің өзгеруінен табиғи апаттардың көбеюі экономиканың әртүрлі салаларына, соның ішінде теміржол көлігіне айтарлықтай әсер етуде. Бұған нақты мысал келтіруге де болады.
Осыдан үш жыл бұрын көктемде қатты жауын-шашынның әсерінен таудан сел ағып, Аспара станциясының маңындағы көпірді, автомобиль трассасын шайып кеткен болатын. Соның салдарынан тақ және жұп жолдардағы жолаушылар пойызы тоқтап қалды. Біз шұғыл түрде көпірді жөндеуге кірісіп, пойыздар қозғалысын қалпына келтірдік, – деді бас инженер.
Дүйсенбек Сыдықов қатты дауылдар мен боранның, жазғы аптап ыстықтардың теміржол инфрақұрылымына тигізер зиянына тоқталып өтіп, жол құрылысы кезінде сол аумақтың қандай географиялық-климаттық белдеулерге жататыны ескерілуі керектігін қозғады. Сонымен қатар жүк тасымалы кезінде, әсіресе химиялық жүктерді тиеу-түсіру, жеткізудегі қауіпсіздік шараларын қатаң сақтау қажеттігін ескертті.
– Жүкті қабылдап-өткізер уақытта вагон-цистерналардың ақаусыз болуын қадағалау, жол бойы техникалық бақылау жүргізу – қоршаған ортаны қорғаудың міндетті талабы болса, екіншіден экономикалық шығындардың алдын алудың жолы, – деп түсіндірді модератор.
Қауіпсіздік және еңбекті қорғау, экология бөлімінің бастығы Медет Қарымбаевтың айтуынша, филиалға қарасты барлық құрылымдық бөлімшелерде қауіпсіздік, еңбекті қорғау, экологиялық мәселеге жауапты мамандар бар. Олар жыл ішінде қоршаған ортаны қорғау бағытында бірнеше рет акция мен түрлі іс-шаралар өткізіп отырады. Айталық, ТЧЭ-31 Жамбыл локомотив пайдалану депосында осындай мақсатта 4 ауқымды іс-шара ұйымдастырылған.
Жиында депо бастығының өндіріс ісі бойынша орынбасары Алмаз Қожабаев өздерінің озық тәжірибелерімен бөлісті. Оның айтуынша, экологиялық акциялар тек қана депо аумағында тал отырғызумен шектелмеген. «Жасыл кеңсе», «Көліксіз бір күн», «Пластиксіз бір күн», «Дармарка» секілді ұйымдастырылған іс-шаралар ұжым қызметкерлерінің де қызығушылығын туғызып, бастаманы түгелдей қолдапты.