Семейде желі бойының тазалығы тексерілді
Абай облысы бойынша меншікті тілші
Семей жүк тасымалы филиалы бойынша өзекті мәселелердің бірі елді мекен аумақтарын көктей өтетін желі бойының тазалығы болып отыр.
Жуырда Семей магистральдық желі бөлімшесінің басшысы Айдын Шәукежанов қала әкімімен бірге облыс орталығындағы теміржол жиектерінің тазалығын тексеріп шықты. Іс-шараға ПЧ-39, ПЧ-40 және станция басшылары да қатысты.
Әуелгі кезекте шаһардың кіреберіс қақпасы саналатын Жаңа-Семей жол дистанциясының аумағы назарға алынды.
Жалпы, желі бойында биылғы сәуір айының 9-жұлдызынан бастап «Таза Қазақстан» экологиялық акциясы аясында бірнеше мәрте сенбілік шаралары өткізілген болатын. Әйтсе де, көңілге кірбің ұялатар жайттар аз болмай шықты. Желі бойындағы жеке сектор тұрғындарының арасында түнгі мезгілде ұрланып келіп теміржол бойына күл-қоқыс, құрылыс материалдарының қалдықтарын төгіп кететіндер аз емес. Ал желінің қос қапталын тазалау теміржолшыларға қосымша жұмыс жүктеп отыр.
Желі бойына жасалған тексеру барысында анықталғандай, бірқатар участоктар бойынша тазалық жұмыстарын қайтадан жүргізу қажет. Айдын Мақсұтбекұлы теміржол бойын ұдайы бақылауда ұстап, жол жиегінде шашылып жатқан қоқыстарды дереу шығарып отыруды тапсырды. Мұнымен қоса, қала басшысы коммуналдық қызмет бойынша жауапты мекемелер өкілдеріне теміржол маңайын тұрақты түрде тазалап, санитарлық талаптарды қатаң сақтауды міндеттеді.
Алдағы уақыттарда жергілікті билік тарапынан желі бойы аумағындағы шағын және орта бизнес нысандарының жетекшілеріне және тұрғындарға түсіндіру жұмыстарын жүргізу көзделіп отыр.
