Риддер және Шемонаиха станцияларында теміржол вокзалдары жөндеуден кейін қайта ашылды
Шығыс Қазақстан облысында Риддер және Шемонаиха станцияларындағы теміржол вокзалдарын ауқымды қайта құру аяқталды. Ғимараттар өткен ғасырда салынған және алғаш рет кешенді жаңартудан өтті. Жұмыстар Мемлекет басшысы мен Қазақстан Республикасы Үкіметінің көлік инфрақұрылымын дамыту жөніндегі тапсырмалары шеңберінде орындалды деп хабарлайды Rail-news.kz.
Қайта құру барысында ғимараттардың тірек конструкциялары күшейтіліп, шатырлар мен инженерлік желілер ауыстырылды, қасбеттер мен ішкі үй-жайлар жаңартылды, жолаушылар платформалары қайта құрылып, вокзал маңындағы аумақтар абаттандырылды, жаңа жабдықтар мен жиһаздар орнатылды.
Жолаушылардың қауіпсіздігі мен жайлылығына ерекше назар аударылды. Вокзалдар мүмкіндігі шектеулі азаматтарға арналған пандустармен, нашар көретін жолаушыларға арналған тактильді тақтайшалармен жабдықталған, өрт қауіпсіздігінің заманауи талаптарына сәйкес қосымша эвакуациялық шығу жолдары көзделген.
1936 жылы салынған Шемонаиха станциясының вокзалы Қазақстан мен Ресей Федерациясының бағыттары бойынша екі жолаушылар пойызына қызмет көрсетеді. Қайта құрудан кейін ғимараттың ауданы 229 шаршы метрді құрады.
1938 жылы салынған Риддер станциясының вокзалы Өскемен және Ресей Федерациясына бағыт алатын төрт жолаушылар пойызына қызмет көрсетеді. Қайта құрудан кейінгі ғимараттың ауданы 470 шаршы метрді құрады.
Жаңартылған вокзалдар қауіпсіздіктің, қолжетімділіктің және қызмет көрсету сапасының заманауи талаптарына сәйкес келеді. Теміржол вокзалдарын жаңғырту бағдарламасы Қазақстанның барлық өңірлерінде жалғасуда.
