Сыр өңірінде теміржол инфрақұрылымы жаңарып, қауіпсіздік шаралары күшейтілді
Қызылорда облысы бойынша меншікті тілші
Соңғы жылдары Қызылорда магистральдық желі бөлімшесінде ауқымды жобалар жүзеге асырылуда. Теміржолшылар инфрақұрылымды жаңғырту, еңбекті қорғау, қызметкерлердің тұрмысын жақсарту бағытында орасан жұмыстар атқарды.
Соңғы бірнеше жыл көлемінде жергілікті атқарушы органдармен бірлесіп Жалағаш, Белкөл және Қазалы станцияларындағы теміржол өткелдері жаңартылып, Қызылорда-Белкөл бекеттері аралығында жаяу жүргіншілерге арналған көпір пайдалануға берілді. Сонымен қатар Арал теңізі – Көнту елді мекені маңында теміржол үстінен өтетін автокөлік көпірі салынып, тұрғындардың қауіпсіз қозғалысына жағдай жасалды.
Бүгінде Қызылорда қаласындағы Жаңқожа көшесі бағытында теміржол астынан өтетін автокөлік және жаяу жүргіншілер өткелінің құрылысы қарқынды жүргізілуде. Бұл жоба аяқталған соң қала тұрғындарының қатынауы жеңілдеп қана қоймай, жол-көлік қауіпсіздігі де жаңа деңгейге көтеріледі деп күтілуде.
Теміржолшылардың еңбек жағдайын жақсарту мақсатында соңғы бес жыл ішінде бөлімше бойынша ондаған жаңа модульдік ғимараттар орнатылды. Қызылорда мен Қазалы сигнализация және байланыс дистанцияларында 21 заманауи модуль іске қосылса, соңғы екі жылда Қызылорда, Қазалы және Сексеуіл жол дистанцияларына тағы 18 жаңа модуль пайдалануға берілді. Алыс бекеттер мен разъездерде еңбек еттін теміржолшылар үшін бұл ғимараттар қолайлы еңбек жағдайын қалыптастырды.
