Түркістан облысында екі теміржол вокзалын қайта жаңарту аяқталды
Түркістан облысында Арыс-2 және Тимур теміржол вокзалдарын қайта жаңарту аяқталды, деп хабарлайды Rail-news.kz.
Жаңарту барысында екі вокзалда шатырды монтаждау, ғимараттарды сыртқы және ішкі әрлеу, кәріз, сумен, жылумен және электрмен жабдықтаудың инженерлік желілерін жаңғырту, перрондарды қайта жаңарту және іргелес аумақты абаттандыру орындалды.
Қайта жаңарту Қазақстан Республикасы Үкіметінің, Көлік министрлігінің, Түркістан облысы әкімдігінің және «Самұрық-Қазына» АҚ қолдауымен Мемлекет басшысының тапсырмасын орындау мақсатында теміржол инфрақұрылымын жаңғырту бағдарламасы шеңберінде жүргізілді. Жоба «ҚТЖ» ҰК» АҚ меншікті қаражаты есебінен іске асырылды.
Вокзалдар заманауи жиһазбен және жабдықтармен жабдықталған, тұрғындардың мобильділігі төмен топтарына арналған пандустармен, сондай-ақ өрт қауіпсіздігі талаптарына сәйкес жаңа эвакуациялық шығулармен жабдықталған. Әрлеу жұмыстарын орындау кезінде қазақстандық өндірістің заманауи берік материалдары пайдаланылды.
2012 жылы салынған Арыс-2 вокзалы ғимарат ауданы 610 шаршы метрді сақтай отырып қайта жаңартылды. Вокзал III класқа жатады. Орташа тәуліктік жолаушылар ағыны 249 адамды құрайды. Станция арқылы күн сайын Астана, Алматы, Қарағанды, Көкшетау, Бурабай курорты, Қызылорда, Атырау, Петропавл, Маңғыстау, Ақтөбе, Орал, Шымкент, Түркістан және Шу, сондай-ақ Ресей және Қырғызстанмен қатынайтын 24 жолаушылар пойызы өтеді.
Сонымен қатар 2012 жылы салынған Тимур вокзалының ауданы 490,5 шаршы метр болатын жаңа бір қабатты ғимарат. Вокзал 2 типке жатады. Орташа тәуліктік жолаушылар ағыны 63 адамды құрайды. Станция арқылы күн сайын Алматы, Астана, Қарағанды, Семей, Петропавл, Көкшетау, Бурабай курорты, Атырау, Ақтөбе, Қызылорда, Тараз, Шу, Шымкент және Түркістан, сондай-ақ Ресей, Өзбекстан және Қырғызстанмен қатынайтын 26 жолаушылар пойызы өтеді.
Вокзалдарды жаңарту елдің 124 теміржол вокзалын жаңғыртудың ауқымды бағдарламасының бөлігі болып табылады.
Жолаушылар инфрақұрылымын дәйекті жаңарту көліктік қызмет көрсету сапасын арттыруға, өңірлерді дамытуға және Қазақстан тұрғындары мен қонақтары үшін қолайлы жағдайлар жасауға бағытталған.
