Абай мұрасы ұлықталды
Абай облысы бойынша меншікті тілші
Семейлік теміржолшылардың қоғамдық-мәдени өміріндегі елеулі іс-шаралардың бірі – жыл сайын дәстүрлі түрде атап өтілетін «Абай күні». Биыл да 10 тамыз – хакімнің туған күні қарсаңында ұлы ойшылдың рухани мұраларын ұлықтап, іс-шара өткізді.
Игілікті іс-шараны бөлімшедегі салалық кәсіподақ ұйымының ұйытқы болуымен Семей локомотив пайдалану депосының машинистері бастаған. Олар қаладағы Абайдың әдеби-мәдени мемориалдық мұражайына экскурсия жасап, осынау қастерлі орында ақын өлеңдерін оқудан челлендж өткізуді қолға алған болатын. Ең алдымен тепловоз машинисі, Абайдың аталас туысы болып келетін Елзат Тілекин ақын өлеңдерін нақышына келтіре мәнерлеп оқып, келесі кезекті НЖС-6 бөлімшесінің қыз-жігіттеріне жолдаған. Міне, осылайша күллі бөлімше бойынша Абай өлеңі мен қара сөзін оқудан бәйге басталып, оны ақынның туған күні саналатын тамызда Семей ЖТ филиалының кадр бөлімінің басшысы Ботагөз Мүбәракова қорытындылады.
Десек те, ұлы ақынның туған күні қарсаңындағы шаралар мұнымен шектелген жоқ. Жылдағы дәстүрге сай Жидебай жеріне саяхат ұйымдастырылып, танымдық басқосулар көптеп ұйымдастырылды. Семей қаласындағы Абай мұрасын ұлықтауға бағытталған тағылымы мол іс-шараларға да белсене қатысты. Белсенді теміржолшы жастар қауымы ақын ескерткішіне гүл шоқтарын қойды. Сондай-ақ «Абай оқулары» мен Абай музей-қорығында өткен көрмелер мен әдеби квесттерге қатысып, ұлы ойшылдың асыл мұрасын көпшілікпен бірге ұлықтады.
