Абай облысында 8 теміржол вокзалы жаңғыртылуда
Абай облысында 10 теміржол вокзалын жаңғырту жұмыстары жүргізілуде. Бұл туралы облыс әкімі Берік Уәлидің төрағалығымен өткен кеңейтілген аппараттық кеңесте айтылды, деп хабарлайды Rail-news.kz.
Мемлекет басшысының тапсырмасына сәйкес еліміз бойынша 124 теміржол вокзалын реконструкциялау бағдарламасы жүзеге асырылып жатыр. Оның аясында Абай облысындағы 10 вокзал жаңартылады.
Маусым айында Бородулиха ауданындағы Ауыл және Белағаш станцияларындағы вокзалдар күрделі жөндеуден өтіп, пайдалануға берілді. Нысандарда вокзал аумағы кеңейтіліп, перрондар жаңартылды. Сонымен қатар іргелес аумақтар абаттандырылды.
Қазір қалған сегіз вокзалда құрылыс жұмыстары жалғасып жатыр. Жоспарға сәйкес Үшбиік, Дегелең, Жалаңашкөл, Шар және Жарма вокзалдарын тамыз айының соңына дейін аяқтау көзделген. Ақтоғай, Аягөз және Семей вокзалдарындағы жұмыстар қыркүйек айының соңына дейін аяқталуы тиіс.
Аягөзде ескі вокзал ғимараты толық бұзылып, оның орнына аумағы 1367,65 шаршы метр болатын жаңа нысан салынуда.
Ал Семей қаласындағы халықаралық теміржол вокзалының аумағы 3037,9 шаршы метрден 4905,05 шаршы метрге дейін ұлғайтылады. Соның нәтижесінде вокзалдың тәуліктік өткізу қабілеті 1619 жолаушыдан 3156 жолаушыға дейін артады.
Жобаға облыс әкімінің ұсынысымен конкорстық өткел де енгізілген. Қазір оның құрылысы басталды.
Кеңес барысында Берік Уәли теміржол инфрақұрылымын жаңғырту халыққа көрсетілетін қызмет сапасын арттыруда маңызды екенін атап өтті.
«Теміржол саласын дамыту, вокзалдарды заманауи талаптарға сай жаңғырту – халықтың өмір сүру сапасын арттыруға бағытталған маңызды қадам. Президент тапсырмасына сәйкес өңірлердегі теміржол вокзалдары кезең-кезеңімен жаңғыртылып, халықтың барлық санатына тең дәрежеде қолжетімді, заманауи әрі жайлы инфрақұрылым қалыптастырылады», – деді облыс әкімі.
Жиын соңында Жолаушылар көлігі және автомобиль жолдары басқармасына «Қазақстан темір жолы» ҰК» АҚ филиалымен бірлесіп құрылыс қарқынын жеделдету, жұмыс күшін тиімді ұйымдастыру және барлық нысанды бекітілген мерзімде аяқтау тапсырылды.