Шалқар жол дистанциясы аумағында жыл басынан бері 5 мал басу оқиғасы тіркелді
Ақтөбе облысы бойынша меншікті тілші
Биыл Шалқар жол дистанциясы аумағында 5 мал басу оқиғасы тіркелді. Оның үшеуі – Шалқар– Тассай, екеуі Шалқар – Сексеуіл учаскелерінде болды.
Теміржолшылар қауіпсіздік талаптарын сақтауды ескертіп, тағы да дабыл қақты. Шалқар жол дистанциясының бастығы Бекбол Айтенов теміржол қауіпсіздігіне қатысты алдын алу және түсіндіру жұмыстарының тұрақты жүргізілуін басты назарда ұстап отыр. Дегенмен сақтық шараларын елемейтіндер әлі де аз емес. Ал оның салдары өте ауыр.
Биыл дистанция қызметкерлері Шалқар – Сексеуіл және Шалқар – Тассай бағыттарына жақын орналасқан елді мекен тұрғындарымен 12 рет кездесу өткізіп, 295 адамға темір жол маңында мал ұстау талаптарын түсіндірді. Ауылдарды аралаған теміржолшылар малдың жолға шығып кетуінен шығын тек оның иесіне ғана емес, пойыз қозғалысына қауіп төндіріп, жолаушылардың өміріне қатер келтіретінін ескертті. Сондықтан әрбір мал иесі өз малының қараусыз қалмауын қамтамасыз етуге тиістігі, темір жол арқылы мал айдауды тек арнайы белгіленген өткелдер арқылы жүргізілу қажеттігі айтылды.
Сонымен қатар темір жолдағы қауіп тек малға қатысты емес. Биыл Тосбұлақ станциясында темір жолды кесіп өтпек болған азаматты пойыз қағып, қайғылы жағдай орын алды. Дистанция қызметкерлері жыл басынан бері темір жол бойында бөгде адамдардың жүруінің алдын алу мақсатында 8 кездесу өткізіп, қауіпсіздік талаптары түсіндірілді. Ал өткелдерде жүргізілген түсіндіру жұмыстары барысында 320 жүргізушіге жол қозғалысы ережелерін сақтау, қызыл сигналға тоқтау, жабық немесе жабылып жатқан шлагбаумнан өтпеу қажеттігі ескертілді.