Атырауда «Қауіпсіз өткел» акциясы аясында 8 өткелде рейд өтті

Республикалық «Заң мен тәртіп» тұжырымдамасы аясында өтіп жатқан «Қауіпсіз өткел» акциясы Атырау магистральдық желі бөлімшесінде де жалғасуда. Атырау мен Құлсары жол дистанциясы жол полициясымен бірлесіп аймақтағы 8 өткелде рейд өткізді.

Бөлімшенің пойыздар қозғалысын сақтау бөлімінің бастығы Мақсот Дүйсәлінің айтуынша, жалпы бөлімшеге қарасты 53 өткел бар. Оның төртеуі күзетілетін өткел. Акция аясында 8 өткелде көлік жүргізушілермен түсіндіру жұмыстары жүргізілу жоспарланған, оның екеуі күзетілетін өткел. Бүгінге дейін Мұқыр, Мақат-рзд-402, Доссор, Майкөмген, Тұманды бекеттеріндегі өткелдерде автокөлік иелерімен түсіндірме жұмыстары жүргізілді.  

– Біздің мақсатымыз – көлік жүргізушілері өткелден өтерде және өткенде заң мен тәртіпті, жол қозғалысы ережесін сақтауға шақыру. Ең алдымен тек рұқсат етілген жерлермен өту, әсіресе күзетілмейтін өткелден өтерде жан-жағына қарап, «Тоқта» белгісіне аялдап, сосын пойыздың жоқтығына көз жеткізгеннен кейін ғана жүру керек. Жол белгілеріне, бағдаршамдарға, дыбыстық белгілерге назар аудару да өте маңызды. Өткелден зулап өте шығам деуге мүлдем болмайды, оның арты талай өкінішті оқиғаларға алып келгені рас. Сондықтан көлік иелеріне сақ болуды, әрдайым тәртіп сақтауды түсіндірдік, – дейді ол.  

Мақат – Құлсары учаскесінің Құлсары – Шоқпартоғай айналымы аралығындағы 1244 шақырым, №6 бекеттегі өткелден тәулігіне 24 жұп пойыз өтеді. Ал автомобиль саны одан көп – тәулігіне бірнеше мыңға барады. Өйткені бұл өткел Теңіз кен орнына қарай жүретін автожолда тұр. Алып кеніш аумағында ондаған компаниялар жұмыс жасаса, оған баратын жеке көлік иелері де аз емес. Соған орай акция аясында 80 көлік иесіне, жүзге тарта тұрғындарға өткелдегі қауіпсіздік тақырыбында түсіндірме жұмыстары жүргізіліп, ақпараттық парақшалар үлестірілді. Бүгінде Атырау – Ганюшкино бағытындағы бірнеше өткелде жалғасуда.