Еліміздің үш өңірінде бес теміржол вокзалы жаңартудан кейін қайта ашылды
Қазақстанның үш өңірінде – Абай, Қарағанды және Ақтөбе облыстарында бес теміржол вокзалын жаңарту аяқталды. Үшбиік, Шар, Жарма, Жарық және Алға станцияларының жаңартылған вокзалдары жолаушылар үшін ашылды, деп хабарлайды Rail-news.kz.
Нысандар Мемлекет басшысының тапсырмасы бойынша іске асырылып жатқан елдің теміржол вокзалдарын жаңарту бағдарламасы шеңберінде жаңғыртылды.
Абай облысында Үшбиік, Шар және Жарма станцияларының вокзалдары қайта жаңартылды.
Үшбиік станциясы 1980 жылы салынған. Қайта құру барысында ғимарат, инженерлік коммуникациялар және перрон жаңартылып, аумақты абаттандыру жұмыстары жүргізілді. Станция арқылы өңірді Семей, Қызылорда, Алматы, Өскемен, Ақтоғай, Шу, Тараз, Шымкент, Түркістан, Павлодар және Қарағанды, сондай-ақ Ресеймен байланыстыратын 10 жолаушылар пойызы өтеді.
Шар станциясы 1982 жылдан бері жұмыс істейді. Қайта құрудан кейін ғимарат пен іргелес инфрақұрылым жаңартылды. Орташа тәуліктік жолаушылар ағыны шамамен 150 адамды құрайды. Станция арқылы Қазақстанның және Ресейдің ірі қалаларымен байланыс орнататын 18 жолаушылар пойызы өтеді.
Жарма станциясы 1996 жылы салынған. Қайта құру аясында ғимарат, инженерлік жүйелер және жолаушылар инфрақұрылымы жаңартылды.Станция арқылы 12 жолаушылар пойызы өтеді.
Қарағанды облысында қайта жаңартудан кейін 1936 жылы салынған Жарық станциясының вокзалы ашылды. Ауданы 484 шаршы метр бір қабатты ғимарат толығымен жаңартылды: шатыры мен қасбеті жөнделіп, инженерлік жүйелер жаңартылды, перрон қайта құрылып, аумақ абаттандырылды, жаңа жиһаздар мен жабдықтар орнатылды.
Вокзалдың қасбеті заманауи әрлеуге ие болды, ішінде тозуға және отқа төзімді материалдар қолданылды. Қосымша эвакуациялық жолдар ұйымдастырылып, өртке қарсы есіктер орнатылды.
Жарық станциясы күн сайын орта есеппен 142 жолаушыға қызмет көрсетеді. Станция арқылы оны Астана, Қарағанды, Қостанай, Алматы, Шымкент, Түркістан, Қызылорда, Жезқазған, Семей және еліміздің басқа да қалаларымен байланыстыратын 30 жолаушылар пойызы өтеді.
Ақтөбе облысында 1935 жылы салынған Алға станциясының вокзалын қайта жаңарту аяқталды. Бір қабатты ғимараттың ауданы 379 шаршы метрді құрайды. Мұнда қасбет, ішкі үй-жайлар мен инженерлік жүйелер жаңартылып, аумақты абаттандыру жұмыстары жүргізілді. Қайта құру кезінде қазақстандық өндірістің материалдары пайдаланылды.
Станция арқылы Алға қаласын Ақтөбе, Алматы, Астана, Маңғыстау, Бейнеу, Орал, Тараз, Шымкент, Түркістан, Шу және Қызылордаменбайланыстыратын 14 жолаушылар пойызы өтеді.
Бес вокзалды қайта жаңарту жолаушыларға қызмет көрсету сапасын арттыруға және жолаушылар мен теміржол қызметкерлері үшін неғұрлым қолайлы және қауіпсіз жағдай жасауға мүмкіндік береді.
Жобалар Қазақстан Республикасы Үкіметінің, Көлік министрлігінің, «Самұрық-Қазына» АҚ және тиісті облыстар әкімдіктерінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.
