Қостанайда жаңартылған теміржол вокзалы ашылды

Қостанайда теміржол вокзалын қайта жаңарту аяқталды. Жаңартылған нысан Мемлекет басшысының тапсырмасы бойынша іске асырылып жатқан еліміздің вокзалдарын жаңғырту бағдарламасы аясында ашылды, деп хабарлайды Rail-news.kz.

Салтанатты рәсімге Көлік министрлігінің, Қостанай облысы әкімдігінің және «Қазақстан темір жолы» ҰК» АҚ өкілдері қатысты.

Қостанай вокзалы 1974 жылы салынған. 

Жаңартудан кейін вокзал өңірдің негізгі көлік нысандарының бірі ретіндегі рөлін сақтады және жолаушылар үшін кеңірек әрі ыңғайлы болды.

Ғимаратта инженерлік жүйелер, шатыр, ішкі және сыртқы үй-жайлар толығымен жаңартылған. Перрон қайта жаңартылып, іргелес аумақ абаттандырылды, жаңа жиһаздар мен жабдықтар орнатылды. Қауіпсіздікке ерекше назар аударылды: қосымша эвакуациялық жолдар ұйымдастырылып, өртке қарсы есіктер орнатылды. Қайта құру барысында ғимараттың ауданы 7 412-ден 8 483 шаршы метрге дейін ұлғайды.

Вокзал қасбеті фиброцемент тақталар мен гранит көмегімен жаңартылды. Ішкі әрлеуде тозуға төзімді және отқа төзімді материалдар, соның ішінде гранит пен керамогранит плиткалары қолданылды. Жаңарту кезінде қазақстандық өндірістің материалдары пайдаланылды.

Қостанай вокзалы күн сайын орта есеппен 2 мыңнан астам жолаушыға қызмет көрсетеді.   Станция арқылы Қостанайды Астана, Алматы, Шу, Қарағанды, Тобыл, Атырау, Орал, Ақтөбе, Бурабай және Көкшетаумен байланыстыратын 18 жолаушылар пойызы өтеді.

Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Қостанай облысы әкімдігінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.