Қызылорда теміржолында қозғалыс қауіпсіздігі көрсеткіштері жақсарды
Қызылорда облысы бойынша меншікті тілші
Қызылорда магистральдық желі бөлімшесінде биылғы жеті айда төтенше оқиғаларға жол берілмей, жол сапасының балдық бағалануы 120 пайызға орындалды. Әрбір анықталған ақау мен жүргізілген профилактикалық рейдтің артында пойыздардың бекітілген кестеден ауытқымай, қауіпсіз қозғалысты қамтамасыз етіп отырған толыққанды өндірістік жүйе мен аймақ теміржолшыларының ерен еңбегі тұр.
Ол – машинистің қырағылығы, жолшының шеберлігі, станция кезекшісінің кәсібилігі, өткелдегі кезекшінің жауапкершілігі – айналып келгенде бәрі бір мақсатқа, яғни қозғалыс қауіпсіздігіне қызмет етеді.
Қызылорда магистральдық желі бөлімшесі қауіпсіздік бөлімінің бас маманы Кенже Қойшыбаеваның айтуынша, жеті ай ішінде жолдың техникалық жағдайын жақсарту бағытында атқарылған жұмыстар да аз емес. Бөлімше жолының балдық бағасы жоспардағы 64-тен 51-ге жетіп, 13 балға асыра орындалған. ПЧ-57 бойынша – 52, ПЧ-59 бойынша – 43, ПЧ-60 бойынша 59 балға қол жеткізілді.
Жолдағы жалпы ақаулар саны өткен жылдың сәйкес кезеңімен салыстырғанда азайып отыр. Қанағаттанарлықсыз бағаланған жол учаскелері өткен жылғы 51 шақырымнан 38 шақырымға дейін қысқарды. Дефектоскопиялық құралдар арқылы 388 ақаулы рельс анықталды. Ал дер кезінде анықталған қауіп – қауіпсіздікке кепіл деген сөз.
Пойыз машинистерінің жедел тежегіш басу жағдайлары да 70-тен 49-ға дейін азайған. Дегенмен бұл жерде де тоқмейілсуге орын жоқ. Оның ішінде 16 жағдай қараусыз малдың жолда жайылуынан, 14 жағдай бөгде адамдар кесірінен, 1 жағдай автокөліктің жолға шығуынан және 18 жағдай мал басудан болған.
Осыны ескере отырып, бөлімше қызметкерлері халықпен түсіндіру жұмыстарын тұрақты жүргізіп келеді. Жеті айда 268 рет жиын өтіп, 10 799 адамға түсіндіру жұмысы жүргізілген. Мектептерде 88 рет кездесу ұйымдастырылып, оқушыларға қауіпсіздік талаптары түсіндірілген. Теміржол маңында 93 рейд өткізілген. Мұның бәрі – қауіптің алдын алуға бағытталған үлкен профилактикалық жұмыс.
Малдың темір жолға шығуының алдын алу үшін де нақты шаралар атқарылуда. Жеті айда 992,9 шақырым малға қарсы қоршау жөнделіп, 50 шақырым жаңа қоршау салу жоспары орындалған. ПЧ-57, ПЧ-59 және ПЧ-60 мекемелерінің бұл бағыттағы еңбегі теміржол бойындағы қауіпсіздік шебін күшейтуге бағытталған.
Теміржол өткелдеріндегі қауіпсіздікке де айрықша көңіл бөлінуде. Бөлімше аумағында 41 теміржол өткелі бар. Жеті ай ішінде өткелдерде 274 рейд өткізіліп, 12 516 жүргізуші қамтылды. Нәтижесінде теміржол өткелдерінен өту қағидаларын бұзу фактілері анықталған жоқ. Бұл – тек жақсы көрсеткіш емес, жүргізушілер мен тұрғындардың қауіпсіздікке деген жауапкершілігін арттыру жолындағы профилактикалық жұмыстың нәтижесі.
– Биыл «Заң мен тәртіп» тұжырымдамасы аясындағы республикалық «Қауіпсіз өткел» профилактикалық акциясына қызылордалық теміржолшылар белсене қатысты. Бөлімшенің солтүстігіндегі Сексеуіл, Қазалы және оңтүстік телімдердегі жол дистанциялары, бөлімшенің қауіпсіздік бөлімі мамандары, БАҚ өкілдері, жергілікті атқарушы билік ұйымдарымен бірге оншақты теміржол өткелінде рейд өткізіп, жүргіншілерге жол қозғалысы ережелерін, темір жолдың аса қауіпті аймақ екені түсіндірілді, ал пойыздардың қозғалыс қауіпсіздігін сақтауды арттыру – теміржолшы еңбегінің басты өлшемі, – дейді қауіпсіздік маманы.
