Павлодар облысында Ақсу-2 станциясы вокзалын жаңарту аяқталды
Павлодар облысында 1981 жылы салынған Ақсу-2 станциясының теміржол вокзалын қайта жаңарту толығымен аяқталды, деп хабарлайды Rail-news.kz.
Жұмыстар Мемлекет басшысының тапсырмасы бойынша іске асырылып жатқан еліміздің теміржол вокзалдарын жаңғырту бағдарламасы шеңберінде орындалды.
Қайта құру барысында ғимараттың төбесі мен қасбеті жаңартылып, үй-жайлардың ішкі безендірілуі жүргізілді. Сумен жабдықтау, кәріз және жылыту жүйелері толығымен ауыстырылып, электр және әлсіз ток желілері жаңғыртылды. Сонымен қатар, вокзалға іргелес аумақ абаттандырылды.
Вокзал 2 типке жатады. Орташа тәуліктік жолаушылар ағыны шамамен 72 адамды құрайды. Станция арқылы Ақсуды Алматы, Астана, Павлодар, Семей, Өскемен және Маңғыстаумен байланыстыратын сегіз жолаушылар пойызы қатынайды.
Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Павлодар облысы әкімдігінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.
