Жамбыл облысында аудан әкімі теміржолшылар саябағы қалпына келтірілетінін айтты
Шу локомотив пайдалану депосының мәжіліс залында Шу ауданы әкімі Қ.Досаев теміржолшылар қауымымен кездесу өткізді. Оған «ҚТЖ» ҰК Жамбыл жол бөлімшесінің Шу аймағы филиалы директорының орынбасары Д.Сыдықов, көлік прокуроры Е.Рыскелдиев, Шу локомотив пайдалану депосының басшысы Қ.Көкірекбаев қатысты.
Жиын барысында аудан басшысы Қайрат Әскербекұлы Шу ежелден теміржол кәсіпорындары көп шоғырланған, сондықтан теміржолшы кәсібін терең сіңген өңір екенін, сондықтан аудан халқының белгілі бір бөлігін құрап отырған теміржолшылардың үлкен күш екенін айтып өтті. Көпшілікті алда келе жатқан мемлекеттік мереке – Тәуелсіздік күнімен құттықтап, еңбектерінің табысты болуына тілектестік білдірді. Әрі қарай Елбасы Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа Жолдауына тоқталған әкім, онда көрсетілген маңызды міндеттер мен оны аудан көлемінде жүзеге асырудың тиімді жолдарын түсіндірді. «Мысалы, 2019 жылдың 1 қаңтарынан ең төменгі жалақы мөлшерін 28 284 теңгеден 42 426 теңгеге көтеру жөніндегі Президент тапсырмасына орай, өңіріміздегі 82 мекемеде 42 мыңнан төмен айлық алатындардың жалақысын өсіру жұмыстары жүргізіліп жатыр» деген әкім, сондай-ақ, халық табысының өсуі, тұрмыс сапасын арттыру, өмір сүруге жайлы орта қалыптастыру, азаматтар сұранысына бейімделген мемлекеттік аппарат, тиімді сыртқы саясат, әрбір қазақстандықтың еліміздегі өзгерістер үдерістеріне атсалысуы сынды басты басымдықтарға терең тоқталып, оны аудан өмірімен байланыстыра отырып баяндады. «Теміржолшылар» саябағын ретке келтіру алдағы жоспар еншісінде барын да назардан тыс қалдырмады.
Аудан басшысымен күнде кездесе бермейтінін ескерген теміржолшылар көкейлеріндегі сұрақтарын қоюға да мүмкіндік алды. Сұрақ-жауап кезеңінде Ж.Апанбаев «Локомотив» стадионын ретке келтіру, Қ.Көкірекбаев осыдан бірнеше жыл бұрын құрылысы басталып, аяқсыз қалған, жаяу жүргіншілерге арналған темір жол өткелінің жұмысын аяқтау, темір жол мекемелері маңында тазалық пен абаттандыру жұмыстарын жүзеге асыру мәселесін көтерсе, Д.Сыдықов көмір ұрлығы тыйылмай тұрғандықтан, оған тосқауыл қою жолдарын қарастыру, осыған орай халық арасында түсіндіру жұмыстарын жүргізу жайын сөз етті. Вокзал маңы мен теміржол жағасында шашылған тұрмыстық қалдықтарды ретке келтіру, санитарлық тазалықты сақтау сынды өзекті мәселелер де ортаға салынды. Жиынға қатысушылар тарапынан қойылған осы және өзге де сұрақтар мен ұсыныстарға Қайрат Досаев қанағаттанарлық жауап беріп, кейбір мәселелер шешімін бірге табуға шақырды.
Жиын соңында аудан басшысы жиынға қатысып, өз ойларын ортаға салып, ашық диалог өрбітуге мүмкіндік берген жүздесу үшін көпшілікке алғысын білдіріп, жуырда ғана тағайындалған жаңа басшы – «ҚТЖ» ҰК» АҚ Жамбыл жол бөлімшесінің Шу аймағы филиалы директорының орынбасары Д.Т.Сыдықовтың алдағы қызметіне сәттілік тіледі.
Динара Батырхаирова
Суретті түсірген Петр Норкин