Маңғыстау теміржолының басшылары депо ұжымдарымен кездесті
Маңғыстау теміржолының басшылары вагон және локомотив шаруашылықтары бойынша депо ұжымдарымен кездесіп, қозғалыс қауіпсіздігінің қамтамасыз етілу тәртібі туралы жиындар өткізуде. Өндірістің ортасында өткен шара қай жағынан да тиімді болғаны анық.
Маңғыстау ЖТ бөлімшесі директорының орынбасары Ерлан Бүркітовтің төрағалығымен өткен вагон пайдалану депосындағы отырыста шаруашылықтың өндірістік-пайдалану қызметінің, биыл 15-19 шілде аралығында «ҚТЖ-Жүк тасымалы» АҚ жүргізген қозғалыс қауіпсіздігін ұйымдастыру және қамтамасыз ету бойынша кешенді ревизия қорытындысы, соның барысында анықталған кемшіліктермен жұмыстар жайы сөз болды. Ол туралы вагон шаруашылығы бойынша ревизор Берік Имашев, депо бастығы Сәрсенбай Есенқұлов, оның орынбасары Майлыбай Камалов және техникалық қызмет көрсету қосынының (ТҚКҚ) бастықтары бейнеулік Нұралы Қылышов, сайөтестік Жаңабай Түйебаев, маңғыстаулық Ерболат Сәулебаев, болашақтық Нұрсұлтан Аяпов, шетпелік Әлібек Шарқатбаев мәліметтер берді.
Жиын барысында әсіресе, жұмысшылардың техникалық білімін көтеруге, олардың өндірістік қызмет пен пойыздар қозғалысы қауіпсіздігі мәселелерін реттеуге арналған басқару құжаттары талаптарын сақтауы мәселелеріне басымдық берілді. Жиын қорытындысында вагондарға сапалы техникалық қызмет көрсету және жасырын ақаулар мен бөлшектердегі ақауларды анықтау әдістері бойынша бейне материалдар түсіру туралы шешім қабылданды. Персоналдың технологиялық процесті қысқартуына жол бермеу үшін олардың өз міндеттерін сапалы техникалық қызмет көрсету арқылы орындауына күн сайынғы бақылаумен қамтамасыз ету тапсырылды.
Ал Маңғыстау локомотив пайдалану депосында өткен жиын «Қозғалыс қауіпсіздігіне ерекше назар» атты айлық аясындағы кешенді жоспар шараларға сәйкес өткізілді. Тексеру тобы депо бойынша кезекшілер мен жұмыс үлестірушілер орнына барып, отандық өнім ТЭ-33А-0094 (Evolution) сериялы жаңа тепловоздың экипаж бөлігі мен басқару кабинасына көтерілді. Депоның командалық-инструкторлық құрамы, локомотив бригадаларының қатысуымен өткен кеңейтілген жоспарлы отырыста депоның ағымдағы жылдың өткен мерзімі бойынша өндірістікпайдалану қызметінің қорытындысы, жаппай жазғы жол жұмыстары кезінде пойыз-телімдерінің өткізгіштік және кіргізу қабілетін арттыру бойынша жасалған шаралар жайы қозғалды. Локомотив бригадаларының соңғы 5 жылдағы стандарттан тыс жағдайлар бойынша іс-қимылдарына баға беріліп, депоның ағымдағы жағдайын жақсарту жөнінде ұсынымдар жасалды.