Зорлық-зомбылыққа жол жоқ

Халықаралық Конвенцияда әйелдерге қатысты кемсітушілікті жою күніне байланысты ҚТЖ көлемінде қолға алынған «Зорлық-зомбылыққа қарсы белсенділіктің 16 күні» акциясы шеңберінде Қызылорда магистральдық желі бөлімшесінде арнайы іс-шара өтті.

Бөлімшенің Ажар Ерманова жетекшілік ететін кәсіподақ ұйымының белсенділері ұйымдастырылған акцияда көз көріп, құлақ естіп жүрген келеңсіз жайттар, әйелдерге зорлық-зомбылық оқиғалары қатаң айыпталып, теміржолшылдарды  мұндай келеңсіз жайдың орын алуына жол бермеуге шақырды. Сонымен қатар  ұйымдастырушылар теміржолшылар арасындағы татулық пен келісім салтанат құрған бақытты отбасыларды үлгі-өнеге ретінде насихаттауды жөн санапты.    

– Компания бойынша 25 қараша мен 16 желтоқсан аралығында «Зорлық-зомбылыққа қарсы белсенділіктің 16 күні» акциясы өтуде. Акция мақсаты – әйелдерге қатысты зорлық-зомбылықтың алдын алу, болдырмау, жолын кесу, ана мен баланың өмірін қорғау, адам саудасына жол бермеу, құлдыққа салудың жолын кесу, сондай-ақ отбасылық құндылықтарды насихаттау, – дейді Ажар Ерманова.

Акция аясында бақытты отбасын насихаттау акциясын кәсіподақ комитеті Қазалы мен Төретам станциясында жалғастырды. Бақытты отбасыларға сөз беріліп, тұрмыстық зорлық-зомбылықтың себеп-салдары, оның алдын алудың жолдары сөз болды. Әрине, ел іші болған соң ала да, құла да болатыны рас, сондықтан кәсіподақ белсенділері тарапынан жақсыны көрсету, игілікке жетелеу, ынтымаққа шақыру, отбасы құндылықтарын үлгі ету қадамдары көпшілікке оң әсер сыйласа керек. Алдағы уақытта жоспарланып отырған кәсіби мамандармен кездесу кеші, зиялылармен пікірлесу жиыны секілді отбасылық құндылықты сақтап, құрметтеу бағытындағы жоспарлы шаралар өз жемісін береді деген сенім мол.  

Мәселен, кәсіподақ белсенділері қазалылық теміржолшы Бақытбек Тілеуқабыл, Төретам вокзалының қызметкері Ақбаян Берденова жайлы және өнегелі  теміржолшылардың жанұясы жайлы бейнетүсірілімдер жасап, үлгі етуді ұстанып отыр.