Мүгедектігі бар жолаушылармен жұмыс істеу тренингі өтті

«Нұрлы жол» вокзал кешені қызметкерлері мүгедектігі бар адамдармен өзара іс-әрекет дағдыларын арттырды. Осы мақсатта олардың арасында арнайы тренинг ұйымдастырылды.  

Бұл тренингті «ДОС» Тәуелсіз өмір» орталығы аталған вокзал кешені қызметкерлері үшін арнайы өткізді. Оған қатысушылар мобильділігі, яғни қозғалысы төмен адамдармен жайлы коммуникация жасау бойынша білімі мен біліктіліктерін шыңдады. Сонымен қатар олар мүгедектерге арналған арба-отырғыштарды қалай қолдану керек, тірек-қимыл аппараттары дұрыс жұмыс істемейтін адамдарды отырғызып, түсірудің халықаралық стандарттарға сай тәртібімен танысты.  

«ҚТЖ» ҰК» АҚ «Астана» теміржол вокзал кешені» филиалы директорының орынбасары Айгүл Өксікбаеваның айтуынша, аталған вокзал кешенінің қызметкерлері кез келген жолаушыларға, соның ішінде қимыл-қозғалысы нашар адамдарға да әрдайым көмек көрсетуге дайын, оларды автокөліктен вагонға дейін және вокзал аумағында керек жеріне ертіп баруда үнемі қолдау көрсететінін жеткізді.  

– Мұндай тренингтер біздің қызметкерлеріміздің біліктілік деңгейін арттырып, олардың жайлы инклюзивті ортада жаңа деңгей жасай алуына септік етеді, – деді ол.  

ҚТЖ-да ерекше қажеттіліктері бар адамдар үшін кедергісіз орта қалыптастыруда вокзал инфрақұрылымын жаңғырту жұмыстары жүргізілуде. Брайль қарпімен жасалған ақпараттық тактильді тақтайшалар, мнемосұлбалар орнатылады. Ақпараттық бюро құлағы нашар еститіндер үшін индукциялық панельдермен жарақтандырылған. 100-ден астам теміржол вокзалдары вокзал кезекшісін шақырту батырмаларымен жабдықталған. Сонымен бірге билет кассалары мен санитарлық тораптарды да қайта жабдықтау бойынша жұмыстар жүргізілуде.