Қуантсаң, қуант баланы...
Атырау облысы бойынша меншікті тілші
Атырауда биыл балалар үшін ұйымдастырылған ойын-сауық шаралары 3 күнді қамтып, оған бірнеше мың бала тартылды.
«Қазкөліккәсіп» Атырау өкілдігінің төрағасы Боранбай Қамиевтің айтуынша, Атырау жүк тасымалы бөлімшесіне қарасты қала маңына жақын Атырау, Ақжайық, Махамбет, Теңдік станциялары, локомотив, вагон деполары, басқару аппараты қызметкерлерінің балаларына жыл соңына дейін қаладағы WOW PARK ойын-сауық орнына сертификат берілді. Соған сәйкес ата-анасы балаларымен қашан, қай уақытта қайда баратынын өздері шешеді. Онда әртүрлі ойын-сауық бағдарламалары, викториналар, конкурстар, спорттық ойындар, т.б. бар. Мұндай сертификат Атырау жүк тасымалы бөлімшесі бойынша 4050 балаға берілді. Сертификат арқылы балалар жыл аяғына дейін ойын-сауық орталығына баруға құқылы. Ойын баласына бұдан артық не керек! Шалғай станцияларда да осындай ойын-сауық шаралары өткізіліп, балаларға әдемі көңіл-күй сыйлады.
Атырау магистральдық желі бөлімшесінің кәсіподақ төрағасы Марат Бисенғалиевтің айтуынша, мұнда да барлық мекеме қызметкерлерінің мыңға жуық балалары түрлі көңіл көтеру шараларына қатысқан. Оларға кәсіподақ атынан ойыншықтар сыйға тартылып, ойын-сауық шаралары ұйымдастырылған.