«Мыңбала» мереке құшағында
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесінің кәсіподақ ұйымы 1 маусым – Халықаралық балаларды қорғау күніне орай теміржолшылардың балаларына ерекше тосын сый жасады.
Тараз қаласындағы «Mynbala» ойын-сауық орталығының алдында арнайы шақырылған аниматорлар балғындарға шоу көрсетіп, естен кетпес қуаныш сыйлады. Жарты сағаттық мерекелік бағдарламада бүлдіршіндер өздері сүйіп тамашалайтын мульфильмдердің кейіпкерлерімен бірге би билеп, ән шырқады.
Бұдан кейін жас жеткіншектер «Mynbala» орталығына кіріп, кешке дейін ойынның қызығына батты. 700-ге жуық балаға кәсіподақ ұйымы тегін тәттілер үлестіріп, балмұздақ таратты.
– Жалпы бөлімшеге қарасты құрылымдарды есепке алғанда 1100 баланы қамтыдық. Бүгін 660 бала келді. Ойын-сауық орталығына арналған билет осы айдың аяғына дейін жарамды. Ата-аналары жұмыстан қолы босаған кезде осында балаларын алып келіп қыдырта алады, – дейді кәсіподақ ұйымының төрағасы Серік Наурызбаев.
«Mynbala» орталығында түрлі ойын алаңдары көп. Сырғанақ та, түгелдей айнамен қапталған сиқырлы бөлме де, құм төселген ойын бұрышы да, ойыншық та жеткілікті. Балғындар кешке дейін алаңсыз ойын ойнап, жаңа таныс тауып, бір-бірімен достасып жатты.
