Балалар жазы көңілді
Маңғыстау облысы бойынша меншікті тілші
Маңғыстаулық теміржолшылардың ұл-қыздарының жаз қызығын көңілді өткізуіне барлық мүмкіндік бар. Олар жаз бойы бірнеше қалаға саяхаттап, лагерьлерде денсаулығын шыңдап, естен кетпес қызықты күндерді бастан кешуде.
Биыл түбек теміржолшыларының балалары Ақтөбе, Жамбыл облысы мен Алматы қаласында демалуы жоспарланған. Ару қала Алматыдағы «Медуза» балалар лагеріне биыл түбектен тоқсан баланың жазғы демалысы қарастырылған. Отыз баладан үш лекпен аттанады. Алғашқы отыз бала осы маусым айында демалып, күні кеше оралды. Оңтүстіктің әсем табиғатымен танысып, лагерьде жаңа достар тауып, он күн бойы балалықтың бал сәттерін бөліскен балалардың көңіл-күйі өте жоғары, алған әсерін айтып тауыса алмауда. Екінші лекпен тағы отыз бала бала әне-міне жолға шықпақ.
Сонымен қатар тағы алпысқа жуық жас өрен Ақтөбе қаласына аттанбақ. Бұл балалар қаладағы «Әсем» лагерінде он күн демалып, жаз қызығын көріп қайтатын болады. Жамбылдағы «Тау самалы» лагеріне биыл 86 бала демалуы жоспарланған. Мұнда да үш лекпен аттанатын балалардың алғашқы тобы аттануға әзір. Маусым айының екінші жартысында басталған балалар демалысы шілде, тамыз айларында да жалғасады.