Бейнеуліктердің игі бастамасы
Маңғыстау облысы бойынша меншікті тілші
«Қайырымдылық жасасаң, қайырын өзің көресің» деген дана халқымыз. Осы жолда көп болып ізгілік жолын қалыптастырған Бейнеу айналым депосының ұжымы игі істер атқаруда.
Биыл да бейнеулік локомотившілер оқушыларды мектепке дайындауға атсалысты. Жылдағыдай 15 ұл мен қызға мектеп киімі мен оқу құралдарын алып берді. Ұжымдағы машинистер мен көмекшілері қайырымдылық қорын құрып, жиналған қаржыға қолдауға зәру жандарға көмектесуді әдетке айналдырған.
– Біздің ұжым «Бір үй аш болса – бүкіл ауыл аш» деген қағиданы берік ұстанады. Сондықтан ұжымнан қайырымдылық қорын құрдық. Қордың мақсаты – ауыл ішіндегі мұқтаж отбасыларға, жетім-жесірге, көпбалалы аналарға қолдау көрсету. Қор арқылы атқарылатын игі істерді бәріміз ақылдасып, келісіп, зерттеп барып шешеміз. Соның ішінде жылда жағдайы төмен отбасылардан оқушыларды мектепке дайындау да бар. Әр айда 10-15 мұқтаж отбасыға азық-түлік алып береміз. Қыс мезгілінде мұқтаж отбасылардың баспанасын жылытуына жәрдемдесіп, есік-терезе орнатып, жылу, жарық, газ жүйелерін тартып бердік. Кейбір жанұяларға коммуналдық төлемдерін де өтеп отырдық. Өткен жолғы Кұлсарыдағы су тасқыны кезінде ауданымызға эвакуалацияланған алпысқа жуық адамды «Ақсәлім» дүкенімен бірлесе бір апта бойы ыстық тамақ пен қажетті көмектермен қамтамасыз еттік. Осы жолда бірігіп жүрген әріптестеріме алғысым шексіз, – дейді Бейнеу айналым депосынан құрылған қайырымдылық қорға жетекшілік ететін машинист Қазбек Сейдалиев.
Оның айтуынша, деполықтар аталған игілікті іспен 2015 жылдан бері тұрақты түрде айналысады. Сол жылы рамазан айында оншақты азамат жиналып, ауызашар беруді қолға алыпты. Бұл бастама ұжымдағы өзгелерге де үлгі болып ай сайын мұқтаж жандарға көмек көрсетіп тұру жөнінде ортақ шешімге келіпті. Уақыт өте келе сауапты іске үлесін қосқысы келетіндер қатары көбейіп, «Қайырымдылық жолы» атты арнайы қор құрылыпты. Бүгінде аталған топта деподан 90-ға жуық белсенді азамат бар. Олар ай сайын өз еркімен қаржы жинап, ауылдағы, аудандағы қолдауды қажет ететін адамдарға көмектесуді жолға қойған. Қор мүшелері қуанышты күндерді есте қаларлықтай өткізуге де атсалысады. Локомотив депосындағы жұмыстың қаншама қиындығына, жауаптылығына қарамастан өз кәсіби міндеттерімен қатар адамгершілік қасиетінен айнымай, ол міндетін де абыроймен атқарып жүрген деполықтар көпке үлгі.