100 теміржолшы донор болды

ҚТЖ-да осы аптаның сейсенбісінде Донор күні ұйымдастырылды. Астанадағы қан орталығынан келген медицина мамандарына компанияның 100 қызметкері қан тапсырып, игілікті істің жоғары деңгейде өтуіне атсалысты.

Донор күнін ҚТЖ-да ұйымдастырушылардың бірі, компанияның Адами ресурстарды басқару департаментінің бас менеджері Венера Гиметдинованың айтуынша, бұл іс-шара биылдыққа осымен үшінші рет өткізілуде.  

– Таңертеңгі сағат 10.00-ден 13.00-ге ұйымдастырылған донор күніне теміржолшылар жеңіл-желпі таңғы ас ішіп келеді, қан тапсырар алдында майлы тамақ жеуге болмайды. Жалпы тоқсанына бір рет ұйымдастырамыз. Жыл соңына дейін тағы бір рет өткізу жоспарда бар. Орташа есеппен әр жолы жүз адамдай донор болады. Кейде 130 адамға дейін өтініш білдіргенмен, біразы денсаулығына байланысты қан тапсыруға жарамай қалады. Теміржолшылар арасында бірнеше жыл, тіпті 10-15 жылдан бері тұрақты қан тапсыратындар бар. Олардың бәрі салауатты өмір салтын ұстанатын, денсаулығы жақсы, донор ретінде тіркеуде тұрғандар, тұрақты донорлар бұл іс-шарадан ешқашан қалыс қалмайды, – дейді ол.  

Қан тапсырған қызметкерлерге бір күн демалыс беріледі, олар оны қалауынша, бір жыл ішінде пайдалануға құқылы. Қан тапсырған күні демалыс алмаған жағдайда екі күндік демалыс алуға болады. Сонымен қатар кан тапсырар алдында олар арнайы сауалнама толтырып, денсаулық жағдайы туралы 32 сұраққа жауап береді.  

– Мен төрт жылдан бері донормын. Өткенде жекеме хат келіп, менің қаным кішкентай балаға құйылғанын біліп қуанып қалдым. Сенің қаның бір адамның өмірін сақтауға сеп болса, ал ол жас сәби болса, қалай қуанбасқа?! Сондықтан мұндай іс-шарадан ешқашан тыс қалмаймын. Өзім салауатты өмір салтын ұстанып, жүгірумен айналысамын, – дейді донор-теміржолшы Әйгерім Битабарова.