Зорлық-зомбылыққа жол жоқ
Қызылорда облысы бойынша меншікті тілші
Қоғам тыныштығын шайқап, отбасының жылуын өшіретін, адамның жан дүниесін жаралайтын ең ауыр кеселдің бірі – зорлық-зомбылық. Тұрмыстық зорлық-зомбылыққа ұшырап жататын нәзік жандардың тағдырына араша түсіп, көлеңкелі құбылыстарға қарсы тұру бүгінгі күннің өзекті тақырыбының біріне айналды.
Қызылорда бөлімшесінде «Бақытты әйел – бақытты ел» тақырыбында ерекше мазмұндағы шара ұйымдастырылды. Магистральдық желі бөлімшесіндегі «Әйелдер қоғамы» ұйымының төрайымы Гүлзада Жақсылықова мен кәсіподақ ұйымының төрайымы Салтанат Махмутова бастаған белсенді қыз-келіншектер бастамашы болған шара нәзік жандардың сырласу кеші, қоғамда орын алып отырған келеңсіз құбылыстарды айыптап, саналарға сәуле түсірер рухани алаң болғаны анық.
Басқосуда теміржолшы әйелдер қоғам мен адамзат алдындағы жауапкершілікті, ортадағы сыйластық пен сенімнің қадірі, отбасындағы ынтымақ жайлы кеңінен сұхбат құрып, зорлық-зомбылыққа қарсы үн қату тек шара өткізумен шектелмей, кез келген әлімжеттілікке нөлдік төзімділікпен қарсы тұру, әрекет ету қажеттігі айтылды.
– Теміржолшылар – тәртіп пен талапқа бағынатын, қызметтік этикасы жоғары адамдар. Сондықтан біздің ортада зорлық-зомбылық фактілері кездеспейді. Ұжым мүшелері арасында да бір-біріне деген сыйластық, жауапкершілік сезімі бәрінен биік, – деп ой бөліскен персонал бөлімінің басшысы Зәуре Алматова қоғамда болып жатқан кейбір келеңсіз жайттарға немқұрайлы қарамауға шақырды.
Төретам вокзалының басшысы Меруерт Әбдіраманова жолаушылармен жүргізілетін қауіпсіздік жұмыстарына тоқталды.
Кездесу барысында жиналған әйелдер зорлық-зомбылыққа қарсы нөлдік төзімділік қалыптастырудың жолдарын талқылап, әрқайсысы өз тәжірибесінен түйген ойларын ортаға салды.
Әйел – отбасының ұясы, жылуы. Әйелдің бақытты болуы – елдің берекесі. Сондықтан «Бақытты әйел – бақытты ел» деген атаудың өзі шараның жүгі мен маңызын айқындап тұрды.
Шара соңында кәсіподақ төрайымы Салтанат Махмутова қатысушыларға естелік сыйлықтар тапсырып, барша әйелдерді зорлық-зомбылықтың алдын алуға, көзжұмбайлыққа салмай, белсенді болуға шақырды.
