Билетке жеңілдік: жоғары орындар сұраныста
Маңғыстау облысы бойынша меншікті тілші
«Жолаушылар тасымалы» АҚ халыққа теміржол көлігінің қолжетімділігін арттыру мақсатында Маңғыстау – Алматы бағытына қатынайтын жолаушы пойызына 25 пайыздық жеңілдік енгізіп отыр.
Бас директордың маркетинг және қызмет көрсету бойынша орынбасары Сұлтан Шабидиновтің айтуынша, 20 қаңтардан бастап №77/78 «Алматы-Маңғыстау» пойызына, купе вагондарының жоғарғы орындарына билет құны 25% жеңілдікпен сатылуда. Жеңілдік екі бағытқа да қатысты. Мүмкіндік мерзімі 12 наурызға дейін созылады. Жолаушылар тарапынан тұрақты сұраныс пен оң әлеуметтік әсер байқалған жағдайда, алдағы уақытта басқа да кезеңдерде ұқсас тарифтік шешімдерді енгізу мүмкіндігі қарастырылады.
– Бүгінде билетке маусымдық сұраныстар басталмаған кезеңде аталған бағыттағы пойыздардың орташа жүктемесі шамамен 50% деңгейін көрсетеді. Сондықтан теміржол тасымалының тартымдылығын және жолаушыларға қолжетімділікті арттыру, сондай-ақ сұраныс жоғары болмаған мерзімде де пойыздардың жүктемесін оңтайландыру мақсатында купе вагондарының жоғарғы орындарына жеңілдік енгізу жобасын іске асырудамыз. Нәтижесі жаман емес, әлі көпшіліктің хабары болмаса да бес-алты күннің ішінде бес жүз шақты билет жеңілдікпен сатылды. Оны барлық сату арналары, атап айтсақ, ішінде теміржол кассалары, bilet.railways. kz ресми интернет-порталы, мобильді қосымшалар және серіктес агрегаторлар арқылы алуға болады.
Бұл бірінші рет емес, бұрын да тәжірибеде болды. Өткен жылы да 22 қыркүйек пен 12 желтоқсан аралығында купе вагондарының жоғарғы орындарына 25% көлемінде маусымдық жеңілдік ұсынылды. Сол кезде жоғарғы орындар сұраныста болды. Жалпы, жеңілдіктер енгізудегі мақсат – алдымен халыққа ыңғайлы жағдай жасау. Әсіресе жастар мен белсенді жолаушылар үшін сапар құнын төмендету, жолаушылар ағынын жоғарғы орындарға бағыттау арқылы төменгі орындардың қолжетімділігін арттыру, – деген Сұлтан Шабидинов жолаушылар компанияның қолданыстағы дисконттық карталарын пайдаланып та жол жүру құнын одан әрі төмендете алатынын айтады.
Демек, «Алтын», «Күміс», «Жастар» және басқа да дисконттық карталар иелері үшін белгіленген тарифтік жеңілдіктер жоғарғы орындарға ұсынылатын акциялармен қатар қолданылады. Нәтижесінде жолаушылар үшін жалпы жеңілдік мөлшері екі есе тиімді бола түспек.