Рамазан – мейірім айы

Қызылорда магистральдық желі бөлімшесінің жастары теміржол бойындағы қарбалас тіршіліктен қолдары қалт еткен уақытты сәтімен пайдаланып, «Жүректен – жүрекке» қайырымдылық акциясын өткізді.    

Рамазан айының рухани тынысы мен қасиетті жұманың шапағаты жас теміржолшылардың жүрек жылумен үндесіп, мешіттегі имамның нұсқауымен екі отбасына көмек көрсетті.  

Бұл жоспар үшін емес, есеп үшін емес, жүректің қалауымен жасалған қадам еді.

Бірі қалтасындағы қаржысын әкеліп қосты. Тағы бірі қаппен Сырдың аппақ күрішін жеткізді. Енді бірі тәттіге толы себет ұстап келді. Ниеті бір, адамға деген қамқорлық пен қайырым.    

Қайырымдылық жәшігіне түскен әрбір тиын, жиналған азық-түлік есеппен жұмсалып, мұқтаж жандарға жеткізілді. Бірнеше шаңыраққа жылу сыйлап, жанарлардан қуаныш көріп, алғысқа кенелген жастардың мақсаты орындалды.  

Осыған дейін де талай отбасының уайымын бөлісіп, мұқтаж жандарға қолдау білдіріп келген жастар кішкентай көмектің өзі үлкен үміт сыйлайтынын сезіне алады. Ал айлардың сұлтаны Рамазанды мейірім мен қайырым мерекесіне айналдырып сауапқа кенелу оларды ерекше қуанышқа кенелтті.    

– «Жақсылық жасайық» деген қарапайым ой бәрімізді бір арнаға тоғыстырды. Әріптесіміз Аружан Мұхтар ұсыныс тастап, оны бөлімше жастары бір кісідей қолдады. Егер жасаған ісіміз бір шаңыраққа демеу болса, мақсатымыздың орындалғаны, – деді қызылордалық теміржолшы жастар атынан инженер Арман Жиенбаев.