Семейлік теміржолшылар арасында футзалдан өткен бәсекеде ВЧД-23 командасы жеңіске жетті
Абай облысы бойынша меншікті тілші
Семей ЖТ бөлімшесінің теміржолшылары ел тәуелсіздігінің 30 жылдығына арналған спорттық сайыстарды қорытындылады. Футзалдан өткен соңғы жарысқа желі бойынан жиналған жалпы саны 11 команда қатысты. Спорттың дәл осы түрі семейлік теміржолшылардың қолайына жағатындықтан қатысуға тілек білдіргендер де көп болыпты. Сол себептен де әрбір команда Дегелең, Шар сынды іргелі станциялардан әуесқой футболшыларды арнайы шақырып, мықты дайындықпен келіпті. Бірінші болып алаңға бөлімше чемпионы ШЧ-29 командасымен ВЧД-23 ойыншылары шықты. Тас-түйін даярлықпен келген вагон қараушылар әу бастан-ақ қарсыластарын ұпай санымен ойсыра ұтты. Осыған дейін алдына команда жіберіп көрмеген чемпиондар бұл жолы айтарлықтай қайрат көрсете алмады. Нәтижесінде Семей вагон пайдалану депосының теміржолшылары суырылып алға шықты. Кейінгі ойындарда да алғашқы жеңістен рухтанған вагон қараушылар айқын басымдықпен ұтып кетіп отырды. Бұл ойынға қатысушы барлық команда үшін күтпеген сенсациялық жағдай болатын. Осылайша, ойын да өз мәресіне жетті. Нәтижесінде бірінші орынды ВЧД-23 командасы иеленсе, екінші орынды ӘТЖК Семей филиалының жігіттері қанжығасына байлады. Жүлделі үшінші орынды НЖС-6 ойыншылары місе тұтты. Ал, жеңіске аз ғана ұпай жетпей қалған ТЧЭ-24 машинистері командалық есеп бойынша төртінші орынға тұрақтады.
– Жігіттер бабында екен. Әсіресе, Ардақ Тұмабаев, Айдар Құлтаев, Мұрагер Қасымханов және Әділхан Бедеров пен Жомарт Болатов өрнекті ойын көрсетті, – дейді ВЧД-23 мекемесінің кәсіподақ ұйымының төрағасы Ертай Темірбеков.