Семей теміржолшылары арасында волейболдан жарыс өтті

Жуырда Семей ЖТ бөлімшесінде волейболдан кезекті біріншілік болып өтті. Бұл жолғы чемпионатқа желі бойынан жалпы саны 6 команда қатысып, өзара шеберлік сынасты.

Ойынға қатысқан теміржолшылардың барлығы да өз командалары бойынша алдын ала іріктеуден өткендіктен тек кіл мықтылар ғана жиналған болатын. Сондықтан да, кездесулер барысы мейлінше тартысты өтіп, сауатты ойын үлгісін көрсетті.

Алғашқы топтық кезең өзара қарымта алмасумен ғана өткенімен, шешуші соңғы сәтте үздік үштікке ілінуге тырысқан командалар барын салды. Мәселен, үшінші орын үшін таласқан Жаңа-Семей мен Семей станцияларының ойыны қызу өрбіді. Қарым-қабілеттері деңгейлес, бұрыннан бәсекелес саналатын қос команда біразға дейін есеп аша алмады. Әйтсе де, соңғы сәттерде Семей станциясының ойыншылары есебін тауып, қарсыластарын қапы қалдырды. Бұл ойынның жалғасына елеулі ықпал еткені анық.

Ал ақтық сында жолығысқан ПЧ-39 бен НЖС-6 командалары бірінші және екінші орындарды сарапқа салған болатын. Жанкүйерлер делебесін қоздырған бұл ойында жолшылар ұпай санымен басым түсіп жеңіске жетті.

Осылайша бас жүлдені Рахат Ботаспаев басқаратын Семей жол дистанциясының құрыш білекті жігіттері иеленді. Екінші орын Семей магистральдық желі бөлімшесі ойыншыларына бұйырса, жүлделі үшінші орынды Семей станциясы місе тұтты.