Таразда Наурыз мейрамына орай шахматтан жарыс өтті
"Қазақстан теміржолшысы" газетінің Жамбыл облысындағы меншікті тілшісі
Қазақстан темір жолының 120 жылдығына орай Наурыз мерекесі қарсаңында жамбылдық теміржолшылар арасында дартстан және шахматтан жарыс өтті.
Жамбыл магистральдық желі бөлімшесінің кәсіподақ комитеті ұйымдастырған және демеушілік жасаған жарыс қызықты және тартысты өтті. Әсіресе теміржолшы қыз-келіншектердің мергендігі сыналған бәсеке өте шиеленісті өрбіді. Жеке шеберлік сынға түсетін жарыста төрешілерді «ШЧ-36» спортшыларының командалық дайындығы таңғалдырмай қалған жоқ. Жүлделі үш орын да осы команданың еншісіне тигені сөзіміздің жәлелі болса керек. Атап айтсақ, 1-орынды Ақбота Ембергенова жеңіп алса, 2-орын Айшабибі Байболова иеленді. Үздік үштікті Алтын Ташенова түйіндеді.
Ал шаршы тақта алдындағы жарыстың басты жүлдесі «ЭЧ-21» электрмен жабдықтау дистанциясының өндірістік оқыту шебері Марат Құлбаевқа бұйырды.
Ойшылдар ойынының финалына дейін жеткен «ЭЧ-23» мекемесінің аға энергодиспетчері Жарас Тұрарбеков 2-орынды еншіледі. Ал ардагер теміржолшы Жасұзақ Алтыбаев 3-орынды олжалап, үздіктер қатарынан көрінді.
Наурыз мерекесінің бастауы болған спорттық бәсекеге белсеніп келіп жүлде алғандардан бөлек барша қатысушыларға сый-сияпат жасалды.
