Семейлік теміржолшылар арасында ұлттық ойындар апталығы өтті

Жуырда семейлік теміржолшылар ұлттық ойын түрлерінен арнайы апталық өткізді. Спорттық шараға қатысушылар саны көп болды және асық ойынынан бастап тоғызқұмалаққа дейін ерлер мен әйелдер арасында тартысты да қызықты сайыс өрбіді.        

Әуелгі кезекте бөлімше ауласына жиналған теміржолшылар қазақтың ұлттық ойыны асық атудан шеберлік сынасты. Оған ерекше даярлықпен сайланып келген 17 адам қатысты. Өзара төрт топқа бөлінген жігіттер біршама уақыт жүлдегерлерді анықтауға күш салды. Мергендік пен төзім қатар сынға түсетін бұл ұлттық ойында ең соңғы финалға төрт теміржолшы шығып, олимпиада жүйесі бойынша сайысқа түсті. Нәтижесінде ВЧД-23 мекемесінен келген Жомарт Болатовтың асығы алшысынан түсіп, чемпион атанды. Ал НЖС-6 ойыншысы Мәди Нұртаев екінші орын алса, вагон қараушы Мұрагер Қасымханов үшінші орынды қанағат тұтты.  

Қыз-келіншектер қауымы «бес асық» ойынынан сынға түсті. Онда осыған дейін үстел теннисі мен жеңіл атлетикадан сынға түсіп жүрген спортшы қыздар көш басынан көрінді. Атап айтсақ, ең көп ұпай жинаған Айгерім Тоқпанова чемпион атанса, екінші орынды Семей станциясы атынан қатысқан Салтанат Қайрамбаева иеленді. Үшінші орынды НЖС-6 ойыншысы Мәдина Садықова місе тұтты.  

Ертеңгісін Семей жол дистанциясының техникалық кабинетінде тоғызқұмалақ ойынынан кең көлемдегі жарыс өтті. Айналым бойынша өткен бәсекеде ерлер арасында ШЧ-29 мекемесінен Әділет Жақсылықов топ жарып, жеңімпаз атанды. Екінші орын ПЧ-39 өкілі Аслан Толымбекке бұйырса, жүлделі үшінші орынды да осы жол дистанциясының теміржолшысы Әділет Ахметжанов айқын басымдықпен жеңіп алды.  

Қыз-келіншектер арасында ұйымдастырылған ұлттық ойынның бұл түрінен тағы да Айгерім Тоқпановаға ешкім жете алған жоқ. Ал екінші орынды Семей жол дистанциясының спортшысы Айгерім Бұланбаева иеленсе, үшінші орынға оның әріптесі Толқын Әшенова лайық деп танылды.  

Сайыстың қорытындысында барлық жеңімпаздар бағалы сыйлықтармен, құрмет грамоталарымен марапатталды.