Шымкентте шахматтан турнир өтті
Түркістан облысы бойынша меншікті тілші
«Жүк тасымалы» ЖШС Шымкент филиалының кәсіподақ комитеті ардагерлер арасында шахматтан турнир өткізді.
Қазақстан теміржолының 120 жылдығына орай ұйымдастырылған зияткерлік ойынға теміржол саласында ұзақ жыл еңбек етіп, бүгінде бейнетінің зейнетін көріп жүрген бір топ ардагер қатысты. Жарыстың ойдағыдай өтуіне атсалысқан Ардагерлер кеңесінің хатшысы Назира Құрманбекова мен кәсіподақ ұйымының сарапшысы Тоқтар Беков және спорт нұсқаушысы Елена Маншина жетекшілік етті. Үш айналым бойынша өзара сайысқа түскен ардагерлердің ойыны тартысты да қызықты өтті. Қызығы сол, жеңімпаз атанғандармен қатар, жеңілгендерге де сый-сияпат жасалып, құрмет көрсетілді.
– Бүгінгідей шараны өткізудегі мақсатымыз зейнеткерлердің басын қосып, бір сәт көңіл сергіту болып табылады. Қарттарға осындай мүмкіндік жасап жатқан кәсіподақ ұйымы мен темір жолда тер төгіп жүрген жетекшілерге ризашылығымызды білдіреміз, – дейді Ардагерлер кеңесінің төрағасы Нұрғали Нұртаев.
Айта кетейік, зияткерлер ойынында жеңіске жеткен Асқар Әбішев пен Сади Сайранбаев және Павел Маншин алдағы уақытта Теміржолшылар күніне орай Астанада өтетін республикалық турнирге жолдама алды. Ендігі жерде осы үштіктен құралған шахматшылар тобы 17 өңірден жиналатын кіл мықтылармен күш сынасып, өңірдің намысын қорғайды.