Күзет қырандары чемпион атанды
Абай облысы бойынша меншікті тілші
Ел шығысындағы теміржолшылар үшін биылғы кәсіби мереке спорттық шаралардың көптігімен, қызу бәсекемен есте қалатын болды. Жуырда желі бойынан жиналған, кіл әуесқой футболшылар бас қосқан аяқдоп сайысы өз мәресіне жетіп, биылғы жылдың чемпионы анықталды.
Кәсіподақ ұйымы ұйымдастырған бөлімше біріншілігі алдын ала ескертілгендіктен даярлық та ерте басталған еді. Сондықтан да болар, желі бойындағы барлық мекемелерден алдын ала іріктелген шағын футболдың шеберлері жиналды.
Сайыстың салтанатты түрдегі ашылу рәсімінде «Қазкөліккәсіп» ҚБ Семей өңірі бойынша өкілі Есен Қажығұлов көпшілікті кәсіби мерекемен құттықтап, қатысушыларға сәттілік тіледі.
Жасыл алаң үстіндегі кездесулер тартысқа толы болды. Осыған дейін алма кезек бөлімше чемпиондары болған семейлік локомотившілер мен байланыс және белгі беру шаруашылығының командасы намысты қолдан бермеуге тырысты. Десекте, өрнекті ойын көрсеткен қозғалысшылар да жоғары деңгейдегі даярлықпен келгендіктерін көрсете білді. Қызуқанды жанкүйерлердің қиқуымен сайыс тіптен қыза түсті.
Барлық командалар бірнеше жыл қатарынан бөлімше чемпионатына үзбей қатысып келе жатқандықтан болар, өте шебер ойын көрсетті. Әдемі пас, командалық рухқа толы шабуыл, үйлесімді футбол комбинациясын көрсете білгендер қатарында әскериленділген теміржол күзетінің жігіттері де болды. Осыған дейін тек арқан тартыс, гір көтеру сынды спорттың ауыр атлетикаға жататын түрлерінен ғана топ жарып жүрген ӘТЖК командасы осылайша күтпеген жерден көпшілікті таң қалдырып бірінші орынды жеңіп алды. Ал, ВЧД-23 командасы екінші орыннан көрінді. Жүлделі үшінші орынды сәл ғана ұпай жетпей қалған ТЧЭ-24 машинистері иеленді.
Кездесу соңында барлық қатысушы командаларға құрмет грамоталары мен медальдар, арнайы кубок салтанатты түрде табыс етілді.