Машинистер сайысы
Маңғыстау облысы бойынша меншікті тілші
Маңғыстау локомотив пайдалану депосының ұжымы мен кәсіподақ комитеті бірлесіп Бүкіләлемдік еңбекті қорғау күніне орай қызметттік міндетін атқару барысында қаза болған теміржолшыны еске алуға арналған турнир ұйымдастырды.
Тепловоз машинисінің көмекшісі Нұрболат Жасанов небәрі 24 жаста еді. Еске түсіре кетсек, 2013 жылы түбек теміржолында жүк пойызы мен жанармай құйған бензовоз соқтығысып, алапат өрт апаты орын алғаны белгілі. Сол оқиға кезінде машинистің денесін қатты күйік шалып, ал машинист көмекшісі Нұрболат Жасанов қаза тапқан.
Шағын футболдан өткен турнирдің ашылу рәсімінде депо басшылығы мен кәсіподақ төрағасы сөз сөйлеп, еңбек қорғау күнінің маңыздылығына тоқталып, еңбек жолы енді басталған Нұрболат есімді жас машинист көмекшісінің қайғылы өлімін еске түсірді, оның есімі әріптестерінің, деполықтардың жүрегінде мәңгі сақталатынын жеткізді. Сол оқиғаны көзбен көргендер өткен жылдардан естеліктер айтты.
Спорттық іс-шара одан әрі өз мақсатына сай жалғасып, тартысқа толы сайыс өтті. Жеңімпаздар анықталып, дипломмен және ақшалай сыйлықтармен марапатталды.
Жарысқа қатысқан командалар ішінен 1-орынды тепловоз машинистері, 2-орынды көмекші машинистер, 3-орынды ТҚК-2 тепловоз жөндеушілері алды.