Теміржолшылар арасында футболдан тартысты турнир өтті

Қызылорда теміржолшылары арасында бұқаралық спортты дамыту және салауатты өмір салтын насихаттау мақсатында, жылдық жоспарға сай дәстүрлі шағын футболдан жарыс ұйымдастырылды. Бұл турнир жұмысшылардың спортқа деген қызығушылығын арттырып, ұжымдық бірлікті нығайтуға жол ашты.

Жарыстың ашылу салтанатында «Қазкөліккәсіп» ҚБ Қызылорда филиалының төрағасы Бауыржан Ахметов, салалық кәсіподақ ұйымдарының жетекшілері мен спорт секторының өкілі Бақытжан Имбергенов қатысушыларды құттықтап, қызықты әрі тартысты ойын өткізуге шақырды. Олар жарыс ережелерімен таныстырып, фэйр-плей қағидаларын ұстануға үндеді.  

Ойын алаңына шыққан 8 команда – НОД, НЖС, ПЧ-57, ТЧЭ-34, ДС Қызылорда, ШЧ-39, ЭЧ-25 және ДС Белкөл өзара шеңберлі тәртіппен бақ сынасты. Әр сайыс жанкүйерлерге нағыз футбол эмоциясын сыйлады. Ұйымшылдық, тактикалық шеберлік пен командалық рух жарыстың негізгі арқауына айналды.  

Қызықты өткен сайыстардың қорытындысында жартылай финалға төрт мықты команда жолдама алды. 3-орынды Қызылорда жол дистанциясының «ПЧ-57» командасы еншіледі. Финалда барын салған «НЖС» құрамасы қарсыласынан бір қадам кейін қалып, күміс жүлдені қанағат тұтты. Ал чемпион атанған – шебер тактикалық ойын өрнегімен ерекшеленген «ТЧЭ-34» командасы. Олар қарсыластарын қапы қалдырып, топ жарып шықты.  

– Бұл жолы марапаттар жекелей ойыншыларға емес, тек құрама командаларға табысталды. Бұл шешім командалық рухты одан әрі арттыруға бағытталған. Футбол – бұл тек ойын емес, ол тәртіп. Футбол алаңы – стратегия және бірлік мектебі. Теміржолшылардың алаңдағы тартысы ұжымдық рухтың сынағы, – деді спорт секторының жетекшісі Бақытжан Имбергенов.  

Жеңімпаз командаларға кәсіподақ ұйымының арнайы сыйлықтары мен дипломдары табысталды. Мұндай спорттық шаралар тек жарыс қана емес, сонымен қатар теміржолшылар арасындағы ынтымақтастық пен серіктестікті күшейтетін маңызды алаң екені анық.