Теміржолшылар зияткерлік пен дәлдікте бақ сынады
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесінің кәсіподақ ұйымы теміржолшылар арасында тоғызқұмалақтан турнир, дартс атудан жарыс өткізді.
Тарихы төрт мың жылдан тамыр тартқан ұлттық ойынды насихаттаған теміржолшылар техниканың тілін білетін маман ғана емес, зияткер ой иесі екендіктерін көрсетті. Теміржолшылар кәсіподағының 120 жылдығына орай ұйымдастырылған турнир тартысты өтті. Бәсі жоғары бәсекеде «ҚТЖ» ҰК» АҚ «Тараз көліктегі оқу орталығының» курсанты Бауыржан Ақтан жеңімпаз атанды. Финалдық ойында қарсыласына отауын ұтқызып алған оқу орталығының хатшысы Диана Рахым 2-орынды иеленді. Ал өрт сөндіруші Мейіржан Аярбеков үздік үштік ойыншыларының қатарын түйіндеді.
Ал дартс атудан екі бірдей жүлдені олжалаған ШЧ-36 Жамбыл белгі беру және байланыс дистанциясы командасының жолы болды. Атап айтсақ, инженер Ақбота Ембергенова үздік мерген деп танылса, электромеханик Айша Байболова 3-орыннан көрінді. Жүлделі 2-орынды «Тараз көліктегі оқу орталығының» технигі Лариса Михалева еншіледі. Жеңімпаздар мен жүлдегерлерге кәсіподақ ұйымы атынан грамота, кубок, медальдармен бірге бағалы сыйлықтар тапсырылды.