Теміржолшылар әлемдік сайыста жүлделі болды
Абай облысы бойынша меншікті тілші
Жаз маусымы – түрлі спорттық сайыстар кезеңі. Бұл ретте семейлік бірқатар әуесқой теміржолшы спортшылар республика көлемінде өткізіліп жатқан байқауларға қатысып, ұлттық компанияның мерейін үстем етуде.
Мәселен, жуырда Қапшағай іргесіндегі Тамғалы тас жайлауында Tengri Ultra көпсайысы болып өтті. Оған әлемнің 20 мемлекетінен келген жалпы саны 2000 мыңға жуық спортшы қатысып, бақ сынасты.
Бұл байқаудың басты ерекшелігі сол, қатысушы спортшылар соқтықпалы, соқпақсыз, сан түрлі кедергілері бар аса күрделі жарыс жолына шығады. Атап айтсақ, шөлейтті құмдауыт дала, жарқабақты тау жоталары мен тастақты өзен аңғарларын санаулы уақыт ішінде жүгіріп өту керек.
Осы орайда семейлік желаяқ теміржолшы, НЖС-6 бөлімшесінің өндірістік-техникалық бөлімінің бастығы Нұрлан Бегәділов 36 шақырым жолды санаулы уақыт ішінде еңсеріп, өз салмақ дәрежесінде жүлделі екінші орынды жеңіп алды.
Бір бұл емес, дәл осы байқауда 7 шақырымдық жолсыз далада өткен сайыста тағы да топ жарып, екінші орын иегері атанды. Республиканың кіл мықты жеңіл атлеттері жиналған байқауда қоржынға екі мәрте жүлде салу оңайға түспепті.
Осылайша бағалы сыйлық пен сайыс марапатын алып қайтқан теміржолшы елге оралысымен жаттығуды қайтадан бастап кетті. Түрлі қашықтыққа жүгіру бойынша жарыстар, марафон, суға жүзуден жарыстар енді басталып жатыр.
