Семейде теміржол ардагерлерін еске алу турнирі өтті
Абай облысы бойынша меншікті тілші
Жуырда Семей ЖТ бөлімшесі бойынша аймақтағы сала кәсіподағы қызметінің ардагерлері – Құрметті теміржолшы Алик Досанов пен Асхат Жармұхаметовты еске алу турнирі болып өтті.
Осымен екінші жыл өткізіліп отырған біріншілік, кезінде марқұм Алик Досанұлының өзі тікелей салынуына ұйытқы болған қаланың «теміржолшылар ауданындағы» футбол алаңында ұйымдастырылды. Спорттық шараға бөлімшедегі кәсіподақ белсенділері, марқұмдардың туыстары мен жақындары келді.
Жиынның беташар рәсімінде бөлімше басшысының орынбасары Ерғазы Жұмаділов пен «Қазкөліккәсіп» ҚБ Семей өңірі бойынша өкілі Есен Қажығұлов сөз алып, лебіз білдірді, командаларға сәттілік тіледі.
Шағын-футбол турниріне байтақ желі бойындағы теміржолшылар арасынан іріктелген командалар қатысып, өзара жүлделі орындарды сарапқа салды. Барлық ойыншылар – түрлі спорттық додаларда сынға түсіп жүрген әуесқой футболшылар болатын. Сондықтан да жеңісті қолдан бермеуге тырысып бақты. Ойын барысы мейлінше қызық әрі тартысты өрбіді.
Әйтседе, көп ұзамай біріншілік нәтижесі де белгілі болды. Биылғы еске алу турнирінің жеңімпазы болып шалғайдан келген Аягөз станциясының командасы танылды. Екінші орынды НЖС-6 командасы жеңіп алса, жүлделі үшінші орын НОД-ЖТ спортшыларына бұйырды. Ал Шар станциясының теміржолшылары бұл жолы төртінші орынды қанағат тұтты. Барлық жеңімпаздар арнайы дипломдармен марапатталып, біріншілік кубогының иегерлері атанды. Оларға бағалы сыйлықтар тарту етілді.
