Маңғыстауда теміржол барысы анықталды
Маңғыстау облысы бойынша меншікті тілші
Түбек теміржолшылары жүлде үшін үш түрлі салмақ бойынша белдесті. Сайыс «Қазкөліккәсіп» ҚБ-нің 120 жылдығына және Теміржолшылар күніне орай ұйымдастырылды. Қазақ күресінен маңғыстаулық теміржолшылардың ішіндегі білекті балуандарды іріктеген бұл жарыс Шетпе станциясында спорт нұсқаушыларының ұйымдастыруымен, кәсіподақ ұйымының қолдауымен өтті.
Темір жолдың темір қазанында қайнап жүрген жігіттер 66, 80 және 80 келіден жоғары салмақ дәрежесі бойынша бақ сынасып, нағыз қара күштің иесі екендерін танытып, бірінен бірі асырып өнер көрсетті. Дегенмен сайыстың аты сайыс, 16 балуанның ішінен жауырыны жерге тимей, күрес қимылдарын жақсы меңгерген үш жігіт өз дәрежесінде іріктеліп шықты. 80+ салмақта 1-орынды Маңғыстау локомотив депосынының тепловоз машинисінің көмекшісі Жандос Қуандықов иемденді. Екінші орынның жүлдесі де локомотив депосы жігіттерінің еншісіне тиіп, тепловоз машинисі Бауыржан Нұрбаев алды. 3-орынға бейнеулік жолшы Нұр Жасаров жайғасты.
80 келі салмақ бойынша бірінші және екінші орындар «Теміржолсу» мекемесінің білекті балуандарына бұйырды. 1-орынды Бауыржан Ботабаев, 2-орынды Досат Зауытбаев алса, 3-орынды Маңғыстау вагон депосынан Жәнібек Сүйінқараев еншіледі.
Маңғыстау вагон депосының Сайөтес станциясындағы вагон қараушысы Досан Жұбандық 66 кг салмақ дәрежесінде абсолютті чемпион атанды. Ал 2-орын «Теміржолсудан» Жұмабай Сапаевқа, 3-орын вагон депосының балуаны Тұрар Ниязовқа бұйырды. Жеңімпаздар диплом, медаль және ақшалай сыйлықтармен марапатталды.
– Қазақ күресінен жарысты өткен жылдан бері ұйымдастырып келеміз. Бүгін Шетпеде өтсе, алдағы уақытта Бейнеуде де өткізуді жоспарлап отырмыз. Бұл жарысқа келе алмағандар соған келіп қатысуға болады. Осы жолғы «Теміржол барысына» түбектегі барлық мекемелерден 16 жігіт қатысып бақ сынады. Бізде білекті де жүректі жігіттер өте көп, бойымызда қазақ қаны ағып жатқан жоқ па?! Сондықтан осы спорт түрін насихаттап, теміржолшыларды салауатты өмір салтын ұстануға шақырамыз, – дейді Бейнеу теміржолшыларының спорт нұсқаушысы Бекзат Нұралиев.
