ЦЖС командасы шағын футбол турнирінің жеңімпазы атанды
«Қазақстан теміржолшысы» газетінің тілшісі
Жақында Магистральдық желі дирекциясының ауыспалы Кубогы үшін шағын футболдан турнир өтті. Жарысқа ЦЖС, ЦШ, ЭЧ-8, ПЧ-17, ЛЖС және РЦУП-3 мекеме- лерінің мықты жігіттерінен құралған алты команда қатысты.
Үшінші жыл қатарынан өткізіліп отырған турнирде әр команда намысты қолдан бермеуге тырысып, көрермендерге тартысты да қызықты ойын сыйлады. Алаң нағыз эмоциялық көңіл-күйге толы болды. Азулы алты командадан іріктелген финалдық ойын тіптен тартысты өтті. Ала допты үйіріп, әрқайсысы қарсыластар қақпасын нысанаға алды. Десе де, желмен жарысатын жылдамдық пен ептілік, шеберлік шешуші рөл атқаратын жарыста Магистральдық желі дирекциясы қызметкерлерінен құралған ЦЖС құрама командасы қарсыластарын шаң қаптырып, оза шауып, жеңіс тұғырынан көрінді.
Жолдың бабын жасауда ғана емес, теңбіл доп тебуде де шеберліктерімен танылған ПЧ-17 командасы екінші орынды еншілесе, үшінші орынды РЦУП-3 командасы қанжығасына байлады. Жеңімпаздар медальдармен, дипломдармен және естелік сыйлықтармен марапатталып, үздік ойын иелері ретінде лайықты бағасын алды.
Ал Астана жол дистанциясы командасының ойыншысы Төлен Нұрбек турнирдің ең үздік ойыншысы атанып, Alem Fest-ке екі билет иеленді.