Абай тойында теміржолшылар топ жарды
Абай облысы бойынша меншікті тілші
Семей өңірінде Абай Құнанбайұлының 180 жылдық мерейтойы аяқталды. Оның құрметіне орай ұйымдастырылған спорттық іс-шаралар бойынша жергілікті теміржолшылар да жеңімпаз атанды.
Атап айтсақ, мерейтой қорытындысы ретінде "Аbai joly ultra trail" жарысы өткізілген болатын. Осынау байрақты бәсекеге жоғары деңгейдегі даярлықпен бөлімшенің вагондар қозғалысы жылдамдығын өлшеуші Еркебұлан Ахмадиев және НЖС-6 техникалық бөлімінің бастығы, ұлттық компания желаяғы Нұрлан Бегадилов бастаған әуесқой жеңіл атлеттер қатысып бақ сынады.
Жарыс Абай мұрасын ұлықтау, салауатты өмір салтын насихаттау және тұрғындардың бұқаралық спортқа қызығушылығын арттыру мақсатында ұйымдастырылды. Сайысқа әр облыстан келген 100-ден астам кәсіби және әуесқой спортшылар қатысты.
Жарыс тәртібі бойынша қатысушылар белгіленген үш шақырым аумақты санаулы минуттар ішінде жүгіріп өтулері тиіс болатын.
Осынау жарысқа теміржолшы спортшыларға қолдау көрсетіп, жанкүйер ретінде "Қазкөліккәсіп" ҚБ Семей өңірі бойынша өкілі Есен Қажығұлов бастаған сала қызметкерлері арнайы келді.
Кіл жүйріктер арасында суырылып алға шығу жігіттерге оңайға түспеді. Деседе намысқа тырысқан қос теміржолшы мәреге алғашқы болып жетті. Осылайша Еркебұлан 35 жасқа дейінгілер арасында жүлделі бірінші орынды жеңіп алса, Нұрлан Мысырұлы 50 жастан жоғарыдағылар арасында жоғары нәтиже көрсетіп, екінші орынды қанжығаға байлады.
Жарыс жеңімпаздары сайысты ұйымдастырушылар атынан арнайы дипломдармен, медальдармен және естелік сыйлықтармен марапатталды.
