Ақтөбе теміржолшылары арасында шахматтан іріктеу турнирі өтті

Ақтөбе станциясындағы «Теміржолшы» жаттығу залында шахматтан жарыс өтті. Жүлделі орын алған мықты ойыншылар республикалық турнирге жолдама алды.

Кәсіподақ ұйымының қолдауымен өткен турнирге өңірдегі теміржол мекемелерінен 20 ойыншы қатысты. НЖС-11, НОДГП-11, ГВЦ, Қандыағаш ШЧ, «Вагонсервис» филиалы, ВЖДО Ақтөбе, ПП «Батыс», ДС Ақтөбе, ВЧД Ақтөбе және ВЧД Шұбарқұдық мекемелерінің қызметкерлері өзара кездесу өткізіп, зияткерлер ойынында шеберлік сынасты.  

– Жарыс жоғары деңгейде өтіп, әр мекемеден сайланып келгендер кәсіби шеберлігін танытты. Әр партия соңына дейін тартысты өтіп, ойыншылардың дайындығы мен тәжірибесі анық байқалды. Шахмат – ойлау қабілетін дамытатын маңызды спорт түрі. Қатысушылардың шеберлік деңгейі жыл сайын өсіп келеді. Бұл – қуантатын жағдай, – дейді спорт нұсқаушысы Нұргүл Батырхан.  

Турнир қорытындысы бойынша ерлер арасында: 1-орын – Нұржан Касаев (ВЧД Шұбарқұдық), 2-орын – Еркебұлан Қапанов (ШЧ-4, Қандыағаш ст.), 3-орын – Уақбай Тоғұсов (ВЧД Ақтөбе) ал әйелдер арасында: 1-орын – Индира Нұржубаева (ПП «Батыс»), 2-орын – Гүлназ Жундикбаева (ШЧ-4, Қандыағаш ст.) иеленді.

Жеңімпаздар мен жүлдегерлер арнайы грамоталармен және естелік сыйлықтармен марапатталды. Сондай-ақ, Бурабайда өтетін дәстүрлі республикалық жарысқа жолдама алды.