Жамбыл филиалында футболдан тораптық жарыс өтті
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының іс-шаралар жоспарына сәйкес Шу және Тараз станцияларында шағын футболдан тораптық турнир ұйымдастырылды.
Шу станциясындағы доп додасына Шоқпар және Шудағы құрылымдық бөлімшелерден 9 команда қатысты. Командалар өзара бақ сынасып, финалистер айналмалы жүйе бойынша іріктелді.
Тораптық жарыс қорытындысында Шу машиналандырылған жол дистанциясы, ТЧЭ-30 Шу локомотив пайдалану депосы, ШЧ-35 Шу белгі беру және байланыс дистанциясының құрамасы жүлделі орындарды иеленді.
– Тораптық турнирлерге командалардан өтінім алдын ала қабылданды. Жарыс әділ өтуі үшін теміржолшылардан басқа ойыншының болмауына баса мән бердік. Себебі шағын футбол және волейбол жарыстарында алаңға бір кәсіпқой спортшы шықса, ойын әділ шешілмейді. Басқа командаға кедергісін келтіреді, – дейді «Қазтеміржолкәсіп» ҚБ Жамбыл филиалының спорт нұсқаушысы Амангелді Байходжаев.
Тараз станциясындағы шағын футбол жарысы да айналмалы жүйеде өтіп, мұнда он команда бақ сынады. «Қазтеміржолкәсіп» ҚБ Жамбыл филиалының спорт нұсқаушысы Евгений Тян финалдық ойын тартысқа толы болғанын айтады.
– Финалда ТЧЭ-31 Жамбыл локомотив пайдалану депосы мен ЭЧ – 21 Жамбыл электрмен жабдықтау дистанциясының құрамалары кездесті. Олар турнирлерде жартылай финалға дейін жетіп жүрген, бір-бірінің ойын өрнегін жақсы білетін командалар. Сондықтан ақтық ойында қарсыластар қорғанысқа көбірек көңіл бөліп, қарымта шабуылдарға иек артып отырды. Сәттілік локомотившілер жағында болды. Күміс жүлде – энергетиктерде! Үздік үштікті ПЧ-51 құрамасы еншіледі, – дейді Евгений Тян.
Қос тораптық турнирдің жеңімпаздарына кәсіподақ ұйымы атынан арнайы кубоктар тапсырылып, ойыншылар медальдар және бағалы сыйлықтармен марапатталды.
