Жеңімпазды сән-салтанатпен қарсы алды

Абыр-сабыр Семей вокзалына ауыр дем алып № 037Т «Маңғыстау-Семей» пойызы келіп тоқтаған сәтте хабарлама жасап тұрған диспетчер дауыс зорайтқыш арқылы тағы да асқақ үнмен саңқылдап қоя берді.  

«Жолаушылар арасындағы Азия чемпионатының үш дүркін чемпионы, Үндістан астанасы Делиде өткен халықаралық жарыстың әлем чемпионы, Семей электрмен жабдықтау дистанциясының электромеханигі Аманжол Аусыдықов Ақтау қаласынан тағы да жеңіспен оралды. Теміржолшыны Азия чемпионы атануымен құтықтаймыз» деді вокзал диспетчері салтанатты дауыспен.

Бұл сәтте «Қазкөліккәсіп» ҚБ Семей өңірі бойынша өкілі Есен Қажығұлов пен ЭЧ-18 басшылығы бастаған теміржолшылар №12-ші вагонның алдында күтіп тұрған болатын. Алтын медальды өңіріне тағып, ҚТЖ туын желбіреткен чемпион есіктен күлімсіреп түсіп келе жатты. Сарт-сұрт соғылған шапалақ пен қошеметке толы ұран сөздер вокзал аспанын жаңғырықтырды.     

Осынау ерекше сезімдерге толы сәтте Семей НОД-ЖТ кәсіподақ ұйымының төрайымы Айгүл Берікболова көпшілікке шашу шашып, барша әріптестері жеңімпазды құшақ жая қарсы алды. Теміржол вокзалының іргесіне жеңімпаздың құрметіне орай қызыл кілем төселіп, безендіріліп, сахна жасалған болатын. Жиналған көпшілік алдында Есен Асқарұлы сөз алып, барша жерлестерінің атынан ыстық тілегін жеткізді. Өз кезегінде бөлімшенің спорт нұсқаушысы, чемпионның бапкері Наталья Мешкова да құттықтау лебіз білдірді. Сонымен қатар, жеңімпаздың иығына қазақы дәстүрмен шапан жабылды.

Ал, қорытынды сөз алған чемпионның өзі қолдау көсеткендері үшін барлық әріптестеріне, ҚТЖ басшылығына алғысын білдіріп, осынау бәсекеге баруына демеу болған салалық кәсіподақ ұйымына рахметін жаудырды.

Аманжол жаттығуды бірер күннен соң қайта жалғастырмақ. Себебі, алдағы күзде Балтық жағалауындағы Латвия елінде гір көтеру спортынан әлем чемпионаты жалауын көтермек. Сан түрлі сайыстарда өзімен бірге алып жүрген ҚТЖ туын осынау халықаралық жарыстағы жеңіс тұғырынан тағы да желбіретсем деп отыр.