Семейде теміржолшылар арасында тұңғыш рет садақ ату турнирі өтті
Абай облысы бойынша меншікті тілші
Шығыстағы теміржолшылар қауымы арасында тұңғыш рет ұлттық спорттың садақ ату түрінен бөлімше біріншілігі болып өтті. Командалық есеп бойынша өткізілген іс-шараға желі бойынан жалпы саны сегіз мекеменің өкілдері қатысып, өзара шеберліктерін сынға салды.
Садақ ату – соңғы уақыттарда семейліктер арасында жақсы дамып келе жатқан спорт түрі. Жас талғамайтын, артық физикалық даярлықты талап етпейтін осынау ұлттық өнерге теміржолшылар қауымының да мықтап ден қоя бастағаны аталмыш біріншілік барысында анық байқалды.
Әр команданың құрамында іріктелген үш мергеннен болды. Бұл ойынның да өзіндік ереже, талаптары бар. Әрбір бақ сынаушы мергенге бес байқап көру және тағы да бес мәрте қорытынды көздеу ұсынылды. Ал жалпы ұпай саны мергендер жинаған ұпай бойынша есептелді.
Алғашқы біріншілік болғандықтан да абдырау болғанымен жалпы барлық ойыншылар шебер түрде өнер көрсетті. Осылайша ақтық сайыста тек үздіктер ғана мәреге жете алды. Атап айтсақ, бірінші орынды ӘТЖК Семей филиалының жігіттері жеңіп алды. Екінші орынға ВЧД-23 мекемесінің садақшылары тұрақтаса, жүлделі үшінші орынды ЭЧ-18 мекемесінің мергендері ие болды.
Дәл осы ойынмен бірге өткізілген арқан тарту сайысында бас жүлдені ПЧ-39 жолшылары алса, екінші орынға ТЧЭ-24, үшінші орынға ӘТЖК Семей филиалының құрыш білекті жігіттері жайғасты.
Бөлімше біріншілігінің соңында барша жеңімпаздар салалық кәсіподақ ұйымының тарапынан әзірленген қомақты ақшалай сыйлықтармен және арнайы дипломдармен салтанатты түрде марапатталды.
Садақ ату бойынша сайыстар өткізу алдағы уақыттарда да жоспарланып отыр. Ал бұл жолғы біріншілікте өнер көрсеткен үздіктер қалалық және облыстық деңгейдегі түрлі жарыстарда теміржолшылар атынан қатысатын болады.