Қызылорда теміржолшылары арасында бильярд турнирінің жеңімпаздары анықталды

Жұмыс сапарымен аймаққа келген «Қазтеміржолкәсіп» ҚБ төрағасының орынбасары Амангелді Төреғожин, бас техникалық инспектор Қайрат Мұқанов, Қызылорда филиалының төрағасы Бауыржан Ахметовтер «Қазтеміржолкәсіп» ҚБ Қызылорда филиалының ұйымдастырумен өткізілген бильярдтан жартылай финал турнирінің ашылу салтанатына қатысты. Ойынның салтанатты ашылуында әріптестеріне кәсіподақ ұйымы әрқашан теміржолшылардың салауатты өмір салтын берік ұстанып, денсаулық сақату мәселесіне айрықша көңіл бөлінетінін айтып ойынды сәтті өткізулеріне тілектестік білдірді.  

Спорт инспекторы Бақытжан Имбергенов жартылай финалға қатысушыларды ойын шарттарымен таныстырып, жолдама сарапқа салынатынын және оны барлық қатысушылардың ұтып алуға мүмкіндігі бар екенін жеткізді.

Бұған дейін Сексеуіл, Қазалы және Қызылорда станциядарында тораптық іріктеу турларында жеңімпаздар арасында өткізілген бұл жарыс бір сөзбен айтқанда кіл мықтылардың арасындағы тартыс болғандықтан өте қызықты өтті. Әнұранмен басталған турнир арнайы шақырылған төрешінің ойын жеребесін тартуымен жалғасты. Жеребе тарту нәтижесінде Сексеуіл жол дистанциясының өкілі Аманжол Құлжанов, Сексеуіл локомотив пайдалану депосының машинисі Рақымжан Құлжанов, Қазалы ШЧ-40 мекемесінен Қылышбек Боранбаев, Қызылорда жол дистанциясынан Еркебұлан Сабырханов, қазалылық Есен Құсанов, Қызылорда ЖТ бөлімшесінен Талғат Сыздықов, Қызылорда локомотив пайдалану депосынан Жомарт Төреханов, ЦД ұжымынан Дархан Биманов, Қызылорда магистральдық желі бөлімшесінен Саят Шабарханов пен Қуат Әділовтер бильярд столында бақ сынасып жүлде үшін жарысқа түсетіні анықталды. Жеребеге сай өзара қарсыластарымен алғашқы айналымды өткізгендер келесі айналымға өтіп жеңіске біртабан жақындай түсті.

Жалпы, бильярд өзіндік ерекше мәдениетімен, философиясымен аймақ теміржолшыларының белсенді түрде ойнайтын спорт түріне айналып келеді. Турнир партияларының әрқайсысында үшбұрышқа жиналған шарларды алғашқы соққымен жан-жаққа шашыратудан бастаған жүлдегерлер қарсыластарына кезек бермей сериялы соққы жасау, шарды алдымен қарсы бортқа соғып, содан кейін барып лузаға түсіру секілді кәсіби әдіс-тәсілдерді қолданып көрермендердің қошеметіне бөленіп жатты. Алма кезек ойын өткізіп өзара мықтыға есе жібергендер қатардан сытылып жатса, жеңіске жақындағандардың мерейі үстем бола бастады. Ойын нәтижесінде қолсозым жердегі жолдама жүлдесіне жақындаған төрт ойыншы қарасы ерекшелене бастады.  

- Жолдаманы сарапқа салған тастаяқ шеберлері арасынан оқ бойы озып шыққан Қызылорда жол дистанциясынан Еркебұлан Сабырханов жүлделі 3-орынды қанағат тұтты. 2-орынға Қызылорда ЖТ бөлімшесінің инженері Талғат Сыздықов көтерілсе, 1-орынды Сексеуіл жол дистанциясынан келген Аманжол Құлжанов қанжығалады. Жүлдегерлер арасындағы тартысты ойын нәтижесінде алғашқы орын иегерлері алдағы уақытта Қарағандыда өтетін финалдық ойын жолдамасына ие болып, аймақ намысын қорғайды, - деді спорт инспекторы Бақытжан Имбергенов.

Жартылай финал ойындарының қауіпсіз әрі қызықты өткізілуі үшін мекемелердің кәсіподақ ұйымдарының белсенділері ереше үлес қосты. Жүлдегерлердің кубок, грамота, ас-суы мен сый-сияпаттары кәсіподақ ұйымы тарыпнан әзірленіп жеңімпаздарға табыс етілді.