Маңғыстау теміржолшылары бильярдтан үздіктерді анықтады
Маңғыстау облысы бойынша меншікті тілші
Қазақстандық салалық теміржол көлігі қызметкерлерінің кәсіби одағы төрағасының кубогы үшін бильярдтан Маңғыстау аймағы бойынша турнир ұйымдастырылды.
Талас пен тартысқа толы өткен турнирге түбек теміржолынан тоғыз мекеме қатысты. Кәсіподақ төрағасының кубогынан үміткер 18 адамның ішінен төртеуі жеңімпаз атанып, арнайы марапаттарға ие болды.
Жарыс қорытындысы бойынша бірінші орын Маңғыстау жол дистанциясының еңбек қорғау инженері Нұркен Рабаевқа бұйырды. Екінші орынды Маңғыстау локомотив депосынан көмекші машинист Жалғас Қуандықов алса, үшінші орынды Маңғыстау вагон депосында қауіпсіздік және еңбек қорғау, экология секторының басшысы Бердібек Чаркатбаев пен Маңғыстау электрмен жабдықтау дистанциясынан бас инженері Нұрболат Беримбаев өзара бөлісті.
Жеңімпаздарға диплом, медаль және бірінші орынның жүлдесі табысталды. Іріктеу турнирінен өткендер енді алдағы уақытта Қарағанды облысында өтетін республикалық жарыста бақ сынайды.