Қызылордалық теміржолшылар ракетка шеберлерін анықтады

Қызылорда станиясындағы салалық мекемелер арасында теннистен кезекті сайыс өтті. Кәсіподақ ұйымдары белсенділері мен «Қазтеміржолкәсіп» ҚБ Қызылорда филиалының мұрындық болуымен өткізілген жоспарлы додаға өңірдегі барлық мекемелерден ойыншылар қатысып, бақ сынады.

Жарыс жоғары деңгейде ұйымдастырылып, тартысты әрі қызықты кездесулер өткізді. Әрбір ойын жеңіске деген жігер мен спорттық рух сыйлады. Қызылорда ЖТ бөлімшесінің қызметкері Әмір Матжанов теннистің нағыз шебері екенін көрсетіп, әдемі ойын өрнегімен дараланып бірінші орынды иеленді. Екінші орын «НОДГП-10» командасының ойыншысы Талғат Сыздықовқа бұйырса, үшінші орынды «ЭЧ-25» командасының мүшесі Қызылорда электрмен жабдықтау дистанциясының қызметкері Бақыт Иманәлиев иеленді.  

Жалпы, қызылордалық теміржолшылар қатарында теннис ойнаумен тұрақты айналысатындар қатары көбейген екен. Бүгінгі спорттық шара бұл тұрғыда нағыз шеберлік сайысы болды десек қателеспейміз. Барлық жеңімпаздар мен жүлдегерлер кәсіподақ ұйымдары тарапынан әзірленген арнайы дипломдармен және бағалы сыйлықтармен марапатталды.  

Спорт секторының жетекшісі Бақытжан Имбергеновтің айтуынша, мұндай спорттық шаралар теміржолшылар арасында салауатты өмір салтын насихаттаумен қатар, ұжымдық бірлікті нығайтып, корпоративтік мәдениетті дамытуға зор ықпал етеді.  

–Теміржолшылар арасындағы достық пен татулықты қалыптастыру, әлеуметтік тұрақтылықты нығайту және салауатты өмір салтын дәріптеу мақсатында ұйымдастырылған бұл спорттық сайыс өз деңгейінде өтті. Бұл жерде мекемелердің кәсіподақ ұйымдары төрағаларының еңбегі зор,– деді ол.