Аядай бекеттегі Азия чемпионы

Маңғыстау теміржолының шеткі нүктесі Болашақ станциясына қарасты Құрмаш бекетінің кезекшісі Әлихан Аббасты теміржолшылар жақсы білсе керек. Екі жыл бұрын қатарынан екі рет әлемдік спорттық додада еліміздің туын көкке көтерген теміржолшы жігіт – АРАШИ ММА бойынша Қазақстанның спорт шебері және осы спорт түрінен Азия чемпионы.

Алдыңғы жылы Египеттің Каир қаласында өткен жарысқа қатысып, жиырмаға жуық елдің спортшылары арасынан суырылып шығып, «ARASHI MMA world championship 2024» жеңімпазы болып оралған Әлиханның тобы командалық есеппен бірінші орынға шығып, Қазақстан қоржынына 17 алтын салды. Қазақ балалары Африка құрлығында еліміздің Әнұранын шырқатып, Әлихан Қазақстан туымен қатар ҚТЖ туын да алып шыққан болатын.  

Сондай-ақ Үндістандағы Азия ойындарына да қатысып, алтын медаль алған ММА жауынгері жан-жақтылығымен де танымал. Спорттың бір түрімен ғана айналысып қоймайды, ММА-ден де басқа жетістіктері көп. Күрестің арнайы тәсілдерін жетік меңгеріп, соның ішінде қоян-қолтық ұрыс бойынша Қырғызстанда өткен ОРЕN турнирінің чемпионы және греплингтен Қазақстан чемпионатында жеңімпаз болған. Бокстан үш мәрте Қазақстан чемпионы. Студенттер арасында өтетін универсиада ойындарында үш жыл қатарынан бірінші орын алған. Қазір «АРАШИ ММА» федерациясының Жаңаөзен қаласындағы жаттықтырушысы. Талай қаракөздің спортты серік етіп, жаман әдеттен аулақ болуына септігін тигізіп жүр.  

– Египетте өткен әлемдік жарысқа қатысу кезінде қолымды сындырып алғанмын. Соған қарамастан, сынған қолмен-ақ жеңіске жеттім. Елге келіп емделуді бастап, жарыстардан біраз уақытқа демалысқа кеттім. Жоспарларым көп болатын. Шәкірттерімді Аргентинаға алып баруды, өзім Абу-Даби мен Ресейдегі және басқа да үлкен жарыстарға қатысуды ойлағанбыз. Оған уақытша денсаулығым жарамаса, кейін қалпына келгесін қаржы мәселесі қолбайлау болды. Египеттегі жарысқа теміржолдың жергілікті кәсіподағы қаржылай қолдау көрсетті. Шетелге шығу арзанға түспейді. Оны шағын бекетте кезекші болып еңбек ететін менің жалақым көтермейді, сондықтан да қазір әлемдік додаларға қатыса алмай отырмын.Бұл аралас жекпе-жек болғасын олимпиадалық спорт түрлеріне жатпайды. Оған демеушілер болмаса, басқа жерден қаржы қарастырылмайды. Ал менің армандарым көп. Әлі талай жерде, бірнеше құрлықта еліміздің көк туын желбіретсек деймін, – деп арманымен бөлісті Әлихан.  

Өткен жылы өмірлік серігін жолықтырып, отау құрған Әлихан жақында әке атанды. Жас жұбайлардың шаңырағында Айдария есімді ару дүниеге келді.